MOSSELBAAI NUUS - Ongeveer 40 lede van die gemeenskap het Vrydagaand deelgeneem aan 'n patrollierit in samewerking met die SAPD, as deel van 'n bewusmakingsveldtog teen misdaad in die bedie-ningsarea van die Mosselbaai-polisie.
Die Mosselbaai Brandweer, Munisipale Verkeer, asook sekuriteitsmaatskappye MSec en ADT het aan die veldtog deelgeneem.
Volgens Anton Landman, koördineerder vir die Heiderand sub-sektor, wat deel vorm van die Mosselbaai-polisie se Sektor 2, wat ook Da Nova en Tarka insluit, is daar tans 30 individue betrokke by gemeenskapspatrollies.
"Die buurtwag is amptelik in April gestig en ons het dadelik met patrollies in Heiderand begin. Aanvanklik was ons net ses."
Soos in ander polisiesektore in die groter Mosselbaai, waar buurtwagte reeds sedert verlede jaar aktief is, gebruik hierdie sub-sektor ook 'n WhatsApp-groep om op hoogte van sake te bly betreffende misdaad in hulle area.
Volgens Kol Haggard, is die tot standkoming van 'n soortgelyke buurtwag bestaande uit gemeenskapspatrollies in Sektor 1, wat die Mosselbaai-sakekern en residensiële omgewing insluit, reeds in die proses.
"Ek is baie opgewonde oor die buurtwagverwikkelinge en glo dat dit net van krag tot krag sal gaan," sê Kol Haggard.
Hy het voorts gesê dat hierdie juis die ideale tyd is om ook verhoudinge tussen die buurtwag en die SAPD gesond te hou.
Kolonel Haggard het by navraag gesê dat daar op Maandagoggend vir die eerste keer in weke, geen nuwe sake van huisbraak of diefstal uit motorvoertuie, wat algemeen plaasvind in Heiderand aangemeld is nie.
"Die SAPD bedank die buurtwagspan en ook lede wat patrollie ry vir hulle harde werk. Dit maak beslis 'n verskil."
Klik hier vir verwante artikels:
- Neigbourhood watch launched
- Patrollies bly aktief
- Polisie wil nuwe buurtwag stig
- Nuwe veiligheidsprojek vir Heiderand
Lede van die gemeenskap van Heiderand, die Mosselbaai Brandweer, Munisipale Verkeer, asook sekuriteitsmaatskappye het deelgeneem aan 'n patrollierit deur Mosselbaai verlede Vrydagaand as deel van 'n misdaadbewsumakingsveldtog. Foto: Cornelle Carstens
ARTIKEL: CORNELLE CARSTENS, MOSSEL BAY ADVERTISER JOERNALIS.
'Ons bring jou die nuutste Mosselbaai, Tuinroete nuus'
