MOSSELBAAI NUUS - 'n Vrou (61) van Heiderand is op Maandag, 11 Mei op borgtog vrygelaat nadat sy die naweek in die aanhoudingselle spandeer het omdat haar 49-jarige man doodgeskiet is.
Lede van die Mosselbaai Polisiestasie is op Donderdag, 7 Mei, om 23:00, na die egpaar se woning in Stinkhoutstraat ontbied nadat die verdagte, Anna du Plessis (Ans), se 25-jarige dogter uit 'n vorige huwelik by bure om hulp gaan roep het. By die polisie se aankoms was Joachim (Martin) du Plessis reeds oorlede.
Die egpaar het na bewering in hulle woning se slaapkamer rusie gemaak kort voordat die slagoffer met 'n .38 rewolwer een keer in sy bors geskiet is. Hy is op die toneel oorlede.
Die egpaar was glo ses jaar getroud en Ans, wat 'n pensionaris is, was sedert 1993 tot 2013 aan die Suid-Afrikaanse Polisiediens verbonde.
Die hof het beveel die verdagte mag nie die dorp verlaat nie en ook nie met staatsgetuies inmeng nie. Sy het geen vorige veroordelings nie. Die saak word tans ondersoek en ballistiese- en die lykskouingsverslag is glo nog uitstaande.
Intussen het 'n 26-jarige vrou op Dinsdag, 12 Mei in die Mosselbaai Landdroshof verskyn nadat 'n .22 pistool wat kort na die moord uit die huis verdwyn het, in Asla Park teruggevind is. Die vrou is glo 'n vriendin van die verdagte se dogter. Sy het borgtog gekry nadat sy aangekla is vir die besit van 'n vuurwapen sonder 'n
lisensie.
Die oorledene se suster, Rika Bekker, het aan die Mossel Bay Advertiser gesê familielede is geskok oor die moord op haar broer.
"Hy was nooit geweldadig nie. Martin het baie vriende gehad en het altyd sy vriende probeer help waar hy kon. Ons is bitter hartseer oor wat gebeur het en daar is soveel vrae. Ons kan nie glo dat Ans so iets sou kon doen nie."
Die slagoffer was 'n passer en draaier en het by Rhodies Marine in Mosselbaai gewerk. Hy het drie kinders - twee seuns van onderskeidelik 27 en 24 jaar oud, en 'n 19-jarige dogter uit 'n vorige huwelik.
'n Roudiens vind by die Mosselbaai NG Kerk Suid plaas op Vrydag, 15 Mei, om 11:00.
Klik hier onder vir vorige nuusflitse:
- Vrou kry borgtog ná sy haar man doodskiet
- Opvolg: Vrou skiet haar man dood
- 61-jarige skiet haar jonger man dood
Joachim du Plessis, ook bekend as Martin.
Die moord is in Stinkhoutstraat, Heiderand gepleeg.
Die ondersoekbeampte in die saak, Ao Moos Rhoode van die Mosselbaai Speurdiens, staan voor die huis waar die moord gepleeg is.
ARTIKEL: LOUISE KARSTEN, MOSSEL BAY ADVERTISER JOERNALIS.
'Ons bring jou die nuutste Mosselbaai, Tuinroete nuus'
