MOSSELBAAI NUUS - Daar is deurlopende ondersteuning vir die graad 9-leerder wat verlede week in haar skool se siekeboeg geboorte geskenk het, sê die Wes-Kaapse departement van onderwys.
Volgens die departement se woordvoerder, Bronagh Hammond, het die meisie op 16 Januarie by die skool se siekeboeg aangemeld en gekla van pyn in haar onderbuik.
"Die leerder se familie is gebel en kort na hul aankoms het sy geboorte geskenk.
"Nooddienste is onmiddellik geskakel en het die leerder en die babatjie behandel. Hulle is toe na die hospitaal geneem. Dit gaan goed met beide die leerder en die babatjie."
Hammond sê die distrik-gespesialiseerde ondersteuningspanne bied psigososiale ondersteuning aan swanger leerders en poog om te verseker dat hulle na die geboorte van 'n baba terugkeer skool toe - "dit is baie belangrik vir leerders om hul onderrig te voltooi".
Swangerskapvoorkomingsprogramme word ook uit die maatskaplike werkkomponente weergegee.
Mossel Bay Advertiser het ook gevra wat in skole behandel word in terme van seksonderrig en/of seksuele gesondheid en op watter ouderdomme.
Hammond sê seksuele opvoeding in skole is gefokus op voorkoming en "die regte keuses maak".
Sy sê die lewensoriëntering-kurrikulum vir elke fase handel oor seks en seksualiteit op gepaste vlakke.
• Die fokus van gesondheidsbevordering in lewensoriëntering in die grondslagfase (graad R tot 3) sluit persoonlike veiligheid in, om kinders in staat te stel om situasies te vermy waar hulle seksueel misbruik kan word.
• Die kurrikulum vir die intermediêre fase (graad 4 tot 6) erken dat kinders toenemend bewus word van hul seksualiteit en verskaf leiding oor die gepaardgaande risiko's.
• Lewensoriëntering in graad 7, aan die begin van die senior fase (graad 7 tot 9) verskaf seksvoorligting.
• Lewensoriëntering in die verdere onderwys en opleidingsfase (graad 10 tot 12) sluit 'n program genaamd "Die lewe se keuses" in waar leerders aangemoedig word om toepaslike keuses te maak.
Lees ook:
Redaksionele kommentaar: Hoekom skryf ons oor tienerswangerskap?
‘Ons bring jou die nuutste Tuinroete, Hessequa, Karoo nuus’
