MOSSELBAAI NUUS - "Die skenking wat die Onafhanklike Entrepreneursvereniging (OEV) en 'n anonieme skenker pas weer tot die Burgemeester se noodle-nigingsfonds gemaak het, is uiters welkom, en sal ons help om behoeftige mense en mense in nood in ons gemeenskap te help."
Só sê die Uitvoerende Burgemeester, Raadsdame Marie Ferreira, na aanleiding van die oorhandiging deur die OEV van 'n tjek van
R34 260 op Woensdag, 18 Maart.
Die skenking het bestaan uit 'n bedrag van R25 000 wat ingesamel is tydens die straatmarkte wat in Desember 2014 in onderskeidelik Hartenbos en Marshstraat gehou is; R4 260 wat ingesamel is tydens 'n potjiekoskompetisie by die Goods Shed, onder leiding van mnr Cornelius Muller; en 'n skenking van R5 000 deur 'n anonieme stalletjiehouer in Hartenbos.
Die tjeks is aan die burgemeester oorhandig deur mnre Willem van Schalkwyk en Noor Boolay, onderskeidelik voorsitter en ondervoorsitter van die OEV.
Die skenking van R5 000 deur die anonieme stalletjiehouer is gemaak, ondanks die feit dat sy R40 000 weens die diefstal van haar produkte verloor het. Sy het verlede jaar ook 'n bydrae gemaak. Raadsdame Ferreira het gesê sy wil die OEV en die anonieme persoon opreg bedank vir hul groothartigheid. Bydraes uit die noodle-nigingsfonds word gemaak aan verdienstelike gevalle in die gemeenskap, en waar die nood op sy grootste is.
"Die fonds is van vrywillige bydraes of fondsinsamelingsaksies afhanklik, en dit is wonderlik dat dit juis klein sakeondernemings is wat op dié manier saam staan en jaarliks vrywillige bydraes tot die fonds maak om die nood in ons gemeenskap te help verlig," het Raadsdame Ferreira gesê.
Die OEV en die anonieme skenker het in 2014 'n gesamentlike skenking van R32 000 aan die fonds gemaak.
'Ons bring jou die nuutste Mosselbaai, Tuinroete nuus'
