MOSSELBAAI NUUS - Nege mense landswyd het tussen 1 Desember 2014 en 14 Januarie 2015 in sleurstrome verdrink.
Drie tienerseuns van Mosselbaai het Sondag 11 Januarie deel van hierdie statistiek geword, toe hulle kort na 14:00 op Diasstrand verdrink het.
Lewensredders was ten tye van die voorval nie meer aan diens op Diasstrand nie, aangesien hulle reeds op 4 Januarie met die oog op die einde van die vakansieseisoen van die strand onttrek is.
Drie plaaslike branderplankryers het 'n wesenlike rol gespeel in die seedrama.
"Dit was nie springgety nie. Daar was nie eens veel branders nie," sê klein Hermann vinnig.
Devon beaam dit, maar noem wel die teenwoordigheid van dieselfde sterk seestroom waarin hy 'n vorige week beland het. Alhoewel hy self 'n sterk swemmer is en die see ken, moes lewensredders, wat toe nog aan diens was, hom uit die see kom help.
Mark van Wyngaard van Surf Mossel Bay, wat ook ten tye die voorval op die strand was, het die teenwoordigheid van die sterk stroom bevestig. "Selfs 'n volgroeide man kon maklik op heuphoogte van sy voete af gesleep word deur daardie stroom. As daar lewensredders was, sou daardie deel (van die strand) beslis nie toeganklik vir swemmers gewees het nie."
Die drie branderplankryers bevestig dat alles vinnig gebeur het. Een waag dit selfs om te noem dat dit skaars meer as 10 minute kon geduur het vandat hulle bemerk het dat iemand in die moeilikheid was, totdat die eerste liggaam uitgespoel het.
Herman se branderplank het uitgespoel en toe hy dit gaan haal, sien hy dat mense in die water dryf.
"Ek het twee sien dryf: die een borsdiepte, en toe sink hy. Toe ek na die tweede een gaan, het hy reeds onder die water verdwyn. 'n Volwasse man wat ook in die water was, het gespartel en na my bord gegryp om te probeer opklim. Hy was paniekerig. Hy het my van die bord bly afstoot uit vrees en ek het besef as dit so aangaan, gaan ons albei gou in die moeilikheid wees," vertel Herman, wat by Nippers, 'n groep kinders wat opgelei word met die oog op lewensredding, betrokke is.
Dis toe dat hy skree om Eugene se aandag te kry.
Devon, wat 'n entjie van die ander twee weggedryf het, het nie dadelik besef wat gaande is nie.
Hy het Hermann solank uitgestuur strand toe om hulp te ontbied.
"Ek het toe begin besef wat aangaan en dat die man seker oor kinders moes toesig hou.
"Daar was skielik 'n klomp mense. Die man het verskriklik te kere gegaan toe hy die kind se liggaam sien. Hy het op sy knieë daar gaan sit en uitgeroep tot mense hom weggelei het. Ek dink die paramedici het hom toe vir skok behandel."
Eugene sê dit verbaas hom hoe mooi die jonge Hermann kopgehou het.
Hermann se pa, Harry, ook betrokke by die Nippers en die plaaslike lewensreddingsklub, sê dat hy sy seun die dag na die tragedie oudergewoonte weer teen 09:00 op Diasstrand gaan aflaai het om branderplank te ry.
"Ja wat," antwoord Hermann.
Eugene meen waarvoor het mens die vermoë en die kennis om te help en jy versuim dan.
"Kry liewer hulp as wat jy jou in 'n onhanteerbare situasie begeef en self verdrink. As jy in die moeilikheid kom, maak duidelik handtekens en skree as jy kan, probeer kalm bly, draai op jou rug en dryf. Bly net bo."
Vanaf 1 Desember 2014 to 14 Januarie 2015 is 31 verdrinkings aangeteken, waarvan 19 volwassenes en 12 kinders was. Sleurstrome word aangedui as die grootste sondebok wat die lewens van nege mense, waarvan vyf kinders is, geëis het.
Volgens die NSRI se Hoof-uitvoerende beampte, dr Cleeve Robertson,
bied die NSRI 'n WaterWise-akademie by skole aan, waardeur hul reeds 620 000 kinders landwyd geleer het hoe om gevaar in die water te vermy, wat om te doen in 'n noodgeval, wie om te kontak en hoe om kardio-respiratoriese resussitasie te doen.
"Ons is baie hoopvol dat die Departement van Onderwys waterveiligheid en kardio-respiratoriese resussitasie in die Lewensoriëntering-kurrikulum sal insluit vanjaar."
ARTIKEL: CORNELLE CARSTENS, MOSSEL BAY ADVERTISER-JOERNALIS
Klik hier vir 'n verwante artikel. 'Ons bring jou die nuutste Mosselbaai, Tuinroete nuus'
