Die raad het na deeglike bespreking uiteindelik met ‘n meerderheid van stemme besluit dat die voorgestelde vernuwing van die gewilde Punt-area, soos beplan en ingevolge die goedgekeurde begroting, sal voortgaan.
Die onderburgemeester, raadslid Dirk Kotzé, het verduidelik dat die opgradering wat nou ter sprake is slegs R1.5m beloop en bestem is om die bestaande randstene en plaveisel wat tekens van verweer toon, te vervang. “Die nodige omgewingsimpakstudies is afgehandel en ‘n uitgebreide openbare deelnameproses is gevolg.
Die Punt ontvang oor besige feestyesowat 100 000 besoekers en is ‘n unieke toeristebestemming, ook vir plaaslike inwoners. Dit vorm deel van ‘n groter inisiatief om Wêrelderfenisstatus vir die gebied te bekom en steek tans af by wat internasionaal die norm is vir toerismebestemmings. Verdere opgraderings in vervolgende fases word in die vooruitsig gestel namate fondse daarvoor bewillig kan word.
Die ACDP-raadslid, Jeanette Gouws, het raadslid Kamfer se mosie gesteun en gesê daar kan nie met ‘n skoon gewete geld aan die opgradering van die Punt bestee word terwyl soveel inwoners in haglike omstandighede moet oorleef nie. Sy het verwys na ‘n beswaarskrif met 840 ondertekenaars wat in 2014 teen die voorgenome herontwikkeling en opgradering van die Punt hul stem laat hoor het.
Ook die hoofsweep van die ANC, raadslid Jovan Bruinders, het gesê dat die opgraderingswerk aan die Punt-area nie prioriteit bo die bestaansbehoeftes van inwoners behoort te geniet nie. Raadslid Kamfer het benadruk dat die voorgenome plan nie die steun van die groter gemeenskap het nie en het gesê geen toeris se belange kan hoër geag word as die bestaansbehoefte van veral agtergeblewe inwoners nie.
Die raadsaal was Donderdagoggend, 30 Maart tydens die raadsvergadering volgepak met besoekers wat by tye luidkeels uitlatings deur opposisiepartye oor die argumente teen die opgradering laat hoor het.
Op aansprake deur raadslid Kamfer dat die geld wat vir die Punt geoormerk is, beter bestee sou kan word om vir oumense en veral gestremde persone binnenshuise toilette te verskaf, het die uitvoerende burgemeester, raadsheer Harry Levendal gesê belastinggeld mag ingevolge wetgewing nie vir opgraderings op privaateiendomme aangewend word nie. Volgens raadslid Gouws word die putlatrinestelsel steeds by 137 huishoudings in Mosselbaai gebruik.
ARTIKEL: NICKEY LE ROUX, MOSSEL BAY ADVERTISER-NUUSREDAKTEUR
'Ons bring jou die nuutste Mosselbaai, Tuinroete nuus'
