MOSSELBAAI NUUS - Die jaarlikse feesgeleentheid vir Arbeidsbediening is weer eens met groot sukses in die Dias-Museumkompleks op Mosselbaai aangebied. Die hele atmosfeer was een van feesviering en dank aangesien die Arbeidsbediening vanjaar hul 30ste bestaansjaar vier.
Die bekende en geliefde sanger, Innes Benadie, het sommer van die begin af met sang en samesang 'n atmosfeer van dank en aanbidding geskep.
Pastoor Jannie Nel het met sy boodskap die gehoor bekwaam op 'n pad van goeie keuses maak, begelei.
"Wie se proriteite dien eerste in jou lewe: God s'n of jou eie?"
- Aanbidding kom voor werk
- Die vrug van die Gees moet swaarder weeg as die gawes van die Gees
- Godswoord is belangriker as tradisies
- Feite voor gevoelens
- Gods wil voor eie wil
- Kwaliteit voor kwantiteit
- Gebed voor beplanning
- Geloof voor logika
- Bydrae tot ander se sukses voor kompetisie
- Waardering voor oordeel
In antwoord hierop het 'n jong sanger, Martin Coetzer, 'n gepaste lied, Neem my lewe Heer gesing.
Pierre Lamprecht, die sameroeper van Arbeidsbediening, het die gehoor herinner aan 30 jaar van groot genade. Meer as 70 lidmate van verskillende kerke is betrokke by die werk van Arbeidsbediening.
"Groot vordering is gemaak, steeds word daar gestreef na beter."
Een van die werkers, Koekie Boshoff, is vereer vir haar meer as 25 jaar van getroue betrokkenheid by Arbeidsbediening. Blomme van dank is aan haar oorhandig.
Die gehoor is hierna na tafels vol lekkernye gestuur met die Jesus-opdrag: Wees Jesus se getuies oral waar jy gaan die vakansie - ook onder jou eie familie.
Pierre Lamprecht, veldwerker vir Arbeidsbediening en die Suid-Kaap voorsitter, Blackie Swart met die spesiale koek wat gebak is vir Arbeidsbediening se 30ste verjaarsdag vanjaar.
ARTIKEL: GERHARD MALHERBE
'Ons bring jou die nuutste Mosselbaai, Tuinroete nuus'
