MOSSELBAAI NUUS - Die wakker optrede van twee konstabels van die Albertinia polisie het vyf geharde jeugmisdadigers se vlaag van misdaad sedert hul ontsnapping uit die Huis Outeniqua-fasiliteit vir minderjarige verhoorafwagtendes op Donderdag, 4 Junie kortgeknip toe hulle die jeugdiges op Maandag, 8 Junie, om omstreeks 18:00, op die N2 in hegtenis geneem het.
Konstabels Francois Fielies, wat ten tye van die arrestasie reeds van diens was, en Rolando Jansen het die voortvlugtendes, wat ook daarvan verdink word dat hulle die kunstenaar Jacolene du Preez (53) op dieselfde middag wreed aangerand het, op die N2 opgemerk.
Die vyftal het vir die polisielede verdag voorgekom. Na die polisie by die jeugdiges stilgehou het, is opgemerk dat drie die sweetpakke van Huis Outeniqua George aangehad het.
Twee mans se klere was bebloed. Die polisie het die sak wat die mans in die pad laat val het, ondersoek. Toe hulle nie kon verduidelik hoe hulle aan die goed gekom het nie, is hulle vir die besit van vermoedelik gesteelde goedere gearresteer.
Die vyf het vermoedelik kort voor hul arrestasie die bekende Mosselbaai kunstenaar, Jackie du Preez, by 'n spoorweghuisie, wat sy as 'n ateljee en kunsgalery by die Gouritzrivierbrug oor die N2 bedryf het, aangeval en wreed aangerand.
Hulle het Du Preez laatmiddag by die galery om water gevra. Na hulle water gedrink het, het hulle aanvanklik weggeloop, maar toe omgedraai, Du Preez om kos gevra, haar toe glo aangeval en herhaaldelik, met 'n klip en ook 'n mes, in onder meer die gesig geslaan en gesteek. Sy is waarskynlik vir dood agtergelaat.
'n Vriend, mnr Frans Joubert, wat kort voor die voorval nog met Du Preez in selfoonverbinding was, het omstreeks 16:50 op die bebloede, bewustelose vrou afgekom. Hy het Du Preez na die Mosselbaai Provinsiale Hospitaal gehaas en die polisie ontbied.
Die vyf 18-jariges het van Du Preez se besittings, soos lampies, kos en 'n selfoon gesteel voordat hulle ontvlug het. Daar is intussen vasgestel dat hulle ook met huisbrake en diefstalle in Groot-Brakrivier, Vleesbaai en Cooper verbind kan word.
Volgens die provinsiale polisiewoordvoerder, Kapt Malcolm Pojie, het sewe jeugmisdadigers aanvanklik ontsnap, maar twee is kort daarna op Riversdal aangekeer.
Die voortvlugtendes word beskou as geharde, geweldadige jeugmisdadigers wat by Huis Outeniqua aangehou is op klagtes wat van poging tot moord, roof en huisbraak gewissel het. Boonop het Huis Outeniqua ook 'n klag van opsetlike saakbeskadiging teen van hulle aanhangig gemaak.
Ten tye van die arrestasie is messe in hul besit gevind, wat onder meer in hul skoene versteek was.
Volgens die woordvoerder van die Wes-Kaapse Regering Gesondheid, mev Nadia Ferreira, is Du Preez by die Mosselbaai-hospitaal se ongevalle behandel vir laserasies op die kop, gesig, arms en bene, asook 'n hoofbesering.
"Sy is tans in 'n stabiele toestand."
Du Preez se swaer, mnr Dries Booyens, het aan die Mossel Bay Advertiser bevestig dat sy nie verkrag is nie.
"Jackie verkeer steeds in baie pyn. Sy is baie erg aangerand, en het onder meer twee steke gekry vir die meswond in haar gesig. Sy het ook skedelbreuk opgedoen. Haar kinders is nou by haar en ons besoek haar gereeld.
"Sy het haar drie skaaphonde die dag van die voorval by haar huis op 'n plaas anderkant die Gouritzrivier gelos. Een van die honde het die rivier, wat tans sterk vloei, getrotseer om na sy ounooi te gaan soek, ons het hom Dinsdag by die galery opgespoor.
"Die voorval is skokkend en het veral my vrou, Jackie se suster, baie ontstig. Jackie is baie lief vir diere. Sy is 'n natuurmens wat haar daarvoor beywer het dat toeriste weer na die Gouritzrivierbrug gelok moes word. Sy het baie hard daaraan gewerk om weer die reksprongbedryf by die brug te laat herleef," aldus mnr Booyens.
Mnr Joubert, die vriend wat op Du Preez na die aanranding afgekom het, sê hy het onraad vermoed toe hy met sy aankoms klere uit Du Preez se boetiek buite die huis sien rondlê het.
"Ek het Jackie binne die kamer aangetref. Sy was bebloed en kon skaars haar oë in reaksie op my vrae beweeg. Ek het met haar hospitaal toe gejaag. Sy kan steeds nie behoorlik praat nie. Ek versorg tans haar diere, en met al die reëlings het ek nog nie regtig tyd gehad om tot verhaal te kom nie. Dis baie traumaties. Toe ek Jackie sien lê, het ek my vrou se dood herleef; sy het net so gelê toe sy aan 'n hartaanval oorlede is," het Joubert gesê.
Die bevelvoerder van die Da Gamaskop Cluster, Brig Gerard Jantjies, het konstabels Jansen en Fielies vir hul oplettendheid wat tot die deurbraak-arrestasie gelei het, bedank.
"Hierdie lede se optrede het geharde jeugmisdadigers wat op 'n reeks aanklagte tereg sal staan, se vlaag van misdaad in ons area kortgeknip, ek bedank hulle vir hul deursettingsvermoë."
Die vyf jeugdiges sal vandag in die Mosselbaai Landdroshof verskyn.
Die Departement van Maatskaplike Ontwikkeling en Huis Outeniqua het nie enige van die herhaalde oproepe na hul kantore beantwoord nie. Die woordvoerder van Minister Albert Fritz, die LUR vir Maatskaplike Ontwikkeling se woordvoerder, Sihle Nogobese, het nie op 'n versoek om kommentaar reageer nie.
Kapt Malcolm Pojie, provinsiale polisiewoordvoerder, het bevestig dat die jeugdiges se ontsnapping aan die Conville polisiestasie gerapporteer is.
Die saak word deur die KwaNonqaba Ondersoekeenheid ondersoek. Enigiemand met inligting word versoek om Ao Archer by 044 606 5607 te kontak.
Meer oor hierdie storie:
Die bevelvoerder van die Da Gamaskop SAPD Cluster, Brig Gerard Jantjies en Lt Kol Raymond Klaasen het Konstabels Francois Fielies (links) en Rolando Jansen vir die deurbraak arrestasie van vyf geharde jeugmisdadigers geloof. Jacolene du Preez (inlas) is by haar kunsgalery by die brug op die N2 oor die Gouritzrivier deur vyf voortvlugtende jeugdiges aangeval en wreed aangerand. Fotos: Nickey le Roux
Jacolene du Preez is by haar kunsgalery by die brug op die N2 oor die Gouritzrivier deur vyf voortvlugtende jeugdiges aangeval en wreed aangerand.
ARTIKEL: NICKEY LE ROUX, MOSSEL BAY ADVERTISER - JOERNALIS.
'Ons bring jou die nuutste Mosselbaai, Tuinroete nuus'
