LEEFSTYL NUUS - Mark Zuckerberg, Facebook-stigter het 'n debat ontketen oor inenting nadat hy 'n foto van hom en sy babadogter, Maxima op sy Facebook-profiel geplaas het op die dag van haar eerste inentings.
Om inenting te ignoreer kan dodelik wees, maar steeds is daar heelwat ouers wat gekant is teen inenting. Die Wêreldgesondheidsorganisasie (WGO) beklemtoom dat inenting noodsaaklik is om jouself en die mense om jou te beskerm.
Inenting dek 'n breë spektrum dodelike siektes en is komplikasies wat met dié siektes gepaard gaan, baie gevaarliker as die newe-effekte van inentings. Lewensgevaarlike aansteeklike siektes is deur middel van inenting suksesvol beheer of uitgewis.
Die volgende inentings word in Suid-Afrika gratis toegedien.
- By geboorte word orale polio-inenting en BCG-entstof teen TB gedoen.
- Op ses weke word 'n orale polio-inenting, Rotavirus-inenting, DTaP-IPV/Hib 1 (dit is teen witseerkeel, tetanus, asellulêre kinkhoes, geïnaktiveerde polio-entstof en tipe B-hemofilusgriep) en HBV (1) teen hepatitis en die pneumokokkale toegevoegde entstof toegedien.
- Op tien weke word 'n DTaP-IPV//Hib en HBV inenting toegedien.
- Op 14 weke word 'n Rotavirus-inenting, DTaP-IPV//Hib, HBV en pneumokokkale toegevoegde entstof toegedien.
- Op Nege maande moet die masels-inenting en PCV toegedien word.
- Op 18 Maande word DTaP-IPV//Hib en 'n Masels-inenting gedoen.
- Op eenjarige ouderdom word waterpokkies en hepatitis A inentings gedoen.
- Op vyf jaar word poliodruppels, die DTP-vaksien en die MMR-vaksien weer gegee.
Wetgewing vereis tans nie inentings nie, maar wanneer 'n vrou geboorte skenk in 'n hospitaal of kliniek kry sy 'n Road to Health-sertifikaat waarop die kind se inentings ingevul moet word.
Meeste skole vereis as deel van hul toelatingsbeleid dat 'n kind inentings vir polio, masels, tuberkulose, witseerkeel, tetanus en hepatitis B kry. Indien daar nie bewyse is nie moet die skoolhoof die ouers vra om die kind te laat inent. Inentings van kinders word tot en met 12-jaar deur die regering gedek.
ARTIKEL: LOUISE MOUTON, SUID-KAAP FORUM-JOERNALIS
'Ons bring jou die nuutste Hessequa, Klein Karoo, Tuinroete nuus'
