LEEFSTYL NUUS - Dek vanjaar 'n Paastafel buite en geniet al
hierdie goeie dinge saam met die mense na aan jou hart.
Laat elkeen iets lekker bring om voor te sit op die tafel en sorg jy vir hierdie vingerlek-lekker hoendergereg.
- 6-8 hoenderborsies, sonder vel of been
- 2 knoffelhuisies, fyn gedruk
- 15 ml gekapte, vars salie
- 45 ml gekapte, vars pietersielie
- Fyngerasperde skil van 1 suurlemoen
- 2-3 snye Provolone of Emmenthalerkaas
- 6-8 tiemietakkies
- 15 ml olyfolie
- 125 ml sjerrie
- Sout en vars gemaalde swartpeper na smaak
Volg die eenvoudige stappe en die gaste sal smul aan die gereg: Voorverhit die oond tot 180 °C. Maak 'n sny teen die kant van elke hoenderborsie en vlek elkeen oop.
Bedek elke hoenderborsie met kleefplastiek en kap liggies platter met 'n vleishamer of rolstok. (Elke borsie moet so dun as moontlik wees sonder dat die vleis vol gate is). Meng die knoffel, salie, pietersielie en suurlemoenskil in 'n bakkie.
Sny die kaassnye in kleiner stukkies en pak daarvan op elke borsie. Smeer die knoffelmengsel bo-oor die kaas, op elke borsie.
Rol die borsies in die lengte op. Sit 'n tiemietakkie boop elkeen en bind vas met 'n stukkie tou. Verhit die olie in 'n oondvaste pan en braai die hoenderrolletjies daarin tot egalig goudbruin. Giet die sjerrie oor en laat opkook.
Verwyder van die stoofplaat en bak in die oond vir 15 minute, tot die hoender gaar is. Laat rus vir 10 minute voor dit voorgesit word.
Om voor te sit, knip die toutjies af en sny die hoenderborsies in skywe. Bedruip met die pansouse en sit voor. Genoeg vir ses tot agt mense.
