MOSSELBAAI NUUS - Met die seisoen op hande, het die SAPD Da Gamaskop verskeie wenke wat hulle graag onder die publiek se aandag wil bring.
Volgens kapt Wollie Fourie, kommunikasie-beampte van die Da Gamaskop-polisie kom huisbrake deurlopend voor in hul bedieningsarea. Items wat gereeld gesteel word tydens huisbrake sluit in selfone, beursies en enige ander elektroniese toerusting wat vinnig geruil kan word vir geld.
Alhoewel huisbrake algemeen voorkom gedurende die dag en nag, vind meeste volgens huidige tendense bedags plaas.
"Ten spyte van die warmer somerweer, let daarop om nie vensters en deure goedsmoeds oop te los nie," meen kapt Fourie.
Hy raai die publiek aan om deel te wees van aktiewe straatkomitees en buurtwagte. "Ken jou bure en veral ook hulle selfoonnommers. Moenie ongeruimdhede of stoornisse wat jy opmerk ignoreer nie. Slaan ag op honde wat blaf en moenie skroom om die polisie in kennis te stel nie."
Voetgangers word in die algemeen dikwels beroof van veral selfone wanneer hulle alleen stap.
"Beweeg in groepe saam, in verligte areas na donker en moenie jou selfoon vertoon waar vermeende boosdoeners dit maklik kan sien nie."
Diefstal uit motorvoertuie kan vermy word indien waardevolle items buite sig in die motor se kattebak gebêre word. Parkeer voertuie in 'n verligte area na donker.
"Wees bedag op enige kenmerke soos klerasie, littekens en dies meer waarvolgens jy 'n misdadiger aan die polisie kan beskryf."
Kaartbedrog tydens die vakansieseisoen is 'n realiteit.
Groot versigtigheid moet aan die dag gelê word wanneer onttrekkings by OTM's gedoen word.
Tydens seisoentyd is strande 'n groot aantrekkingskrag, ook vir misdadigers.
"Moenie alleen op strande gaan stap met waardevolle items nie. Heneglaars moet beslis ook verkieslik in groepe hengel op veral Diasstrand. Waak daarteen om waardevolle items sonder toesig op die strand te los wanneer jy gaan swem. Tree voorkomend op deur waardevolle items liewer in die motor te los, of 'n vriend of familielid te vra om daarna om te sien terwyl jy in die branders baljaar."
Die stasiebevelvoerder van die Da Gamaskop-polisie, kol Charmain van der Sandt bedank die gemeenskap, vrywilligers en ander medewerkers vir hulle ondersteuning om die net om misdadigers stywer te span.
"Ons wens alle Mosselbaaiers en ook besoekers 'n geseënde feestyd toe."
'Ons bring jou die nuutste Mosselbaai, Tuinroete nuus'
