MOSSELBAAI NUUS - Tydens die spesiale Raadsvergadering op Maandag, 25 Januarie, is 'n aanbeveling aanvaar dat 'n Taakspan saamgestel word om met alle relevante rolspelers te konsulteer sodat 'n aanbeveling oor die verwydering en aanplant van bome in Hartenbos aan die Raad voorgehou kan word.
Hierdie besluit volg deels op probleme wat inwoners van Hartenbos nou reeds vir minstens twee jaar ervaar met bosluisvoëls wat in groot getalle in sommige van veral die Norfolk-dennebome in die area voorkom.
In Hartenbos is die Norfolk-dennebome die mees algemene boomspesie wat, hoewel dit 'n uitheemse spesie is, nie ingevolge die Nasionale Omgewingsbestuur: Wet op Biodiversiteit (Wet 26436/2004) (NEMBA) 'n geklassifiseerde indringerspesie is nie. Daarenteen kom die gewone dennebome (Pinus Pinaster), 'n Kategorie 1b boom wat beheer moet word, ook daar voor.
Die bome in Hartenbos, wat nie 'n besonder boomryke area is nie, is reeds sowat 30 jaar oud, indien nie ouer nie.
Die Norfolk dennebome veroorsaak volgens die munisipaliteit se ondervinding nie wesenlike skade aan infrastruktuur soos water-, rioolpype, mure of geboue nie. Dit word ook beraam dat dit sowat R7 000 per boom sal beloop om van die bome te verwyder.
Die Raad is daarop gewys dat goedkeuring om die bome te verwyder per implikasie mag beteken dat geen verdere versoeke om Norfolk-dennebome te verwyder, voorts afgekeur sal mag word nie.
Die Raad het ook verneem dat sypaadjieruimte in die groter Mosselbaai vir die aanplanting van nuwe bome baie beperk is en dat dit in die meeste gevalle nie haalbaar sal wees om nuwe bome te vestig op plekke waar ou bome uitgehaal word nie. Sou nuwe bome nie aangeplant kan word nie, is aangevoer, sal dit 'n negatiewe invloed op die estetieka van die area waar die bome verwyder word, hê.
Die verwydering van die bome gaan gevolglik 'n negatiewe invloed hê op die biodiversiteit van die omgewing in die algemeen.
Versoeke om bome te verwyder waarin bosluisvoëls 'n oorlas is, sal gevolglik met die grootste omsigtigheid benader moet word.
Die Raad het 'n Boom Beleid wat al die aspekte rakende die bestuur van bome aanspreek. Die Raad se Taakspan, bestaande uit die Uitvoerende Burgemeester, Raadsdame Marie Ferreira, Raadslid Petru Terblanche, Raadslid Dirk Kotze, die Direkteur Gemeenskapsdienste, die Bestuurder: Tuinbou, Sport en Ontspanning en die Omgewingsbeampte sal vervolgens verantwoordelik wees om, ingevolge die Boom Beleid, 'n opname in Hartenbos te doen om vas te stel waar daar bome is waarvoor meriete bestaan om verwyder of aangeplant te word, en om met die relevante rolspelers te skakel waarna 'n verslag opgestel moet word met aanbevelings vir oorweging.
Daar is nie 'n keerdatum vir hierdie verslag vasgestel of ooreengekom nie.
ARTIKEL: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
