GROOT-BRAKRIVIER NUUS - Op Dinsdag, 9 Mei het Nathan Mowers (23), die man wat skuldig bevind is aan die moord en verkragting van Lesley-Ann Maya (17), sy vierde dag in die Drakenstein-gevangenis uitgedien.
Mowers is op Donderdag, 4 Mei in die Mosselbaai rondgaande hooggeregshof tot 25 jaar tronkstraf gevonnis vir die misdrywe wat hy in April 2015 gepleeg het.
In Sonskynvallei het klein Trishane Maya op dieselfde dag, Dinsdag, 9 Mei, sy vyfde verjaarsdag vier. Dit was Trishane se derde verjaarsdag sonder sy ma, Lesley-Ann.
Trishane se ouma en ma van Lesley-Ann, Remona, is nou Trishane se nuwe "mamma".
"Ja, Trishane noem my mamma," sê Remona. "Ek maak hom nou groot. Daar is geen ander uitweg nie."
Die Maya-gesin het onlangs ook 'n nuwe lewe op Sonskynvallei begin. Dit volg nadat inwoners van Powertown gevra is om in Sonskynvallei te hervestig.
Remona se vriend, Maxwell, het reeds sy huis op Sonskynvallei gekry en haar huissleutels kry sy binnekort. "Dit is beter huise as wat ons in Powertown gehad het en ons het nou 'n ordentlike dak oor ons koppe."
Lesley-Ann se ouma, Lena, wat destyds op Lesley-Ann se liggaam afgekom het waar dit onder 'n ou mat versteek was, skaars 100m van hul huis, het ook op Sonskynvallei kom woon.
In die verhoor het die Staat getuig dat Remona en Lena sukkel om Lesley-Ann se dood te verwerk en dat Remona met depressie worstel.
"Jy weet, Trishane soek nog elke dag sy ma. Hy praat baie van haar. Nou die oggend het hy my 05:00 wakker gemaak. Toe begin ons weer oor Lesley-Ann gesels. Trishane weet wat gebeur het. Hy sê Lesley-Ann is nou by Liewe Jesus."
Dit gaan beter noudat die hofsaak verby is, sê sy. "Die regter (ET Steyn) het 'n moeilike taak op hande gehad. Dit gaan goed met my noudat alles verby is en hy (Mowers) gestraf is.
"Dit gaan nou beter as wat dit ooit kon gaan. Ek sou steeds net wou weet hoekom hy Lesley-Ann vermoor het. Daar is nog baie vrae waarop ons nie antwoorde kon kry nie omdat Nathan nie self in die hof getuig het nie."
Remona sê hulle glo ook nie dat Lesley-Ann se liggaam vir agt dae onder hul neuse gelê het nie. "Ons het oral gesoek. Ook daar waar sy gelê het."
Trishane gaan steeds na die kleuterskool in Powertown. Remona sal vir Trishane 'n partytjie by die huis hou.
"Ons het sommer sy verjaarsdag hier gevier. Hy ry elke dag saam met Maxwell. Dit gaan goed met ons. Ons is verlig dat alles verby is."
.
Remona Maya hou 'n foto van haar kleinseun vas.
Klik hier vir vorige artikels:
- 'Ek het Lesley-Ann vermoor'
- Powertown-moordenaar erken skuld
- Powertown-moorde: Vonnisoplegging in Mei
- Opvolg: Powertown-moordenaar vas
- Powertown-moorde: Verdagte skuldig
- Powertown-moorde: Uitspraak Woensdag
- Powertown-moorde: Verhoor in hooggeregshof
- Powertown-moorde: Verhoor begin vandag
- Powertown murders: Case in high court
- Powertown-moorde: Verdagte dié week in hof
- Opvolg: Powertown-moorde
ARTIKEL & FOTO'S: LOUISE KARSTEN, MOSSEL BAY ADVERTISER-JOERNALIS
'Ons bring jou die nuutste Groot-Brakrivier, Tuinroete nuus'
