MOSSELBAAI NUUS & VIDEOS - Die Seekadette verbonde aan die TS Outeniqua Mosselbaai gaan 2017 tegemoet met die vooruitsig van beter fasiliteite.
Mosselbaai se Uitvoerende Burgemeester, raadsheer Harry Levendal, het belowe dat die Seekadette fasiliteite sal kry waarop die eenheid trots kan wees en waar meer Mosselbaaiers van hul uitstekende werk te wete sal kom.
“Dit is ‘n belofte,” het raadsheer Levendal benadruk. Die TS Outeniqua gebruik tans die fasiliteite van die Mosselbaai-seiljagklub.
Die burgemeester was egter baie beïndruk met die dissipline en vertoning van die seekadette tydens hul uitpasseringsparade op Saterdag, 26 November en meen daarom dat hul projekte en suksesse sigbaarder moet wees.
Die burgemeester was die eregas tydens die jaarafsluitingsfunksie waar luisterryk erkenning gegee is aan die prestasies, harde werk en toewyding van die eenheid, individuele lede en offisiere verbonde aan die TS Outeniqua.
Hy het aan die jongmense gesê: “Julle is die alternatief waarna ons soek, julle stel ‘n voorbeeld aan ander jongmense deur julle opoffering en deursettingsvermoë, ongeag omstandighede.”
Hy het die ouers en offisiere vir hul harde werk en bydrae tot die sukses van die eenheid geloof, en die borge wat tot die sukses van die eenheid bydra, vir hul betrokkenheid bedank.
“As jong mens het ek besef ek moet die meester van my eie lewe wees en verantwoordelikheid vir my besluite en keuses neem. Julle onderskei julle as jong leiers en Mosselbaai is trots op julle en op wat julle vermag. Ons is veral trots op mejuffroue Drudé en Claassen wat Mosselbaai voorts by die maritieme akademie sal verteenwoordig, en ek moedig almal aan om daarna te strewe om in hul spore te volg.
“Dissipline, toewyding en entoesiasme is duidelik by elk van julle, dit is tyd dat die dorp ook in julle belê,” het Raadsheer Levendal gesê.
Die burgemeester het die parade geïnspekteer alvorens hy trofeë aan die onderskeie pryswenners uitgedeel het.
Die bevelvoerder van die TS Outeniqua, Sub Lt (SCC) Thurston Amsterdam, het hulde gebring aan ervare seeman Valden de Jager wat in Januarie vanjaar tragies gesterf het.
Luitenant Amsterdam het die 2016 Seekadette namens die offisiere met hul prestasies geluk gewens en benadruk dat die eenheid baie trots is op wat hulle as ‘n groep vermag het.
“Nie almal kan vandag met ‘n trofee wegstap nie, maar elk van julle is leiers in eie reg. Aan diegene wat vanjaar hul skoolloopbaan afsluit, wens ons ‘n blink toekoms toe.
Bravo Zulu.
Die volgende kadette het elk trofeë ontvang:
- Nuweling van die jaar – Seeman Enzich Michaels
- Bywoning van die jaar – Seeman Justine Haynes
- BSQ van die jaar – Seeman Pearl Claassen
- Bevare seeman van die jaar – Bevare Seeman Taisha Saayman
- Piper van die jaar – Bevare seeman Leche van Rooyen
- Sportman van die jaar – Seeman Caroline Drudé
- Kadet van die jaar – Bevare seeman Luwayne Leshawa
- Cygnet van die Jaar – Seeman Caroline Drudé.
Kyk hieronder na 'n video:
Talle hoogwaardigheidsbekleërs verbonde aan die Mosselbaai Hawe, uniformmagte van Mosselbaai en munisipale raadslede het die TS Outeniqua se luisterryke prysuitdelingsfunksie by die Mosselbaai Seiljagklub bygewoon.
ARTIKEL, FOTO'S & VIDEO: NICKEY LE ROUX, MOSSEL BAY ADVERTISER-NUUSREDAKTEUR
'Ons bring jou die nuutste Mosselbaai, Tuinroete nuus'
