MOSSELBAAI NUUS - Riool het in die eerste week van Desember weer by Diasstrand in die see geloop terwyl mense op die voetpaadjie vroegoggend bo-oor en selfs deur die vrot water gedraf het.
'n Entjie daarvandaan het 'n gesin houtgerus met hul klein dogtertjies op die strand baljaar.
Mosselbaai se munisipale woordvoerder, mnr Harry Hill, het vandeesweek bevestig dat die water weens opnude verstoppings in die munisipale rioolstelsel by twee mangate oorgeloop en in die stormwatersloot neffens die woonhuis bekend as Blue Waters afgelei is tot waar dit op die strand en in die see beland het.
"Dit gebeur gereeld dat rommel, wat koerante, weggooidoeke, selfs motorbande en ander gemors insluit, in die stormwaterstelsel gegooi word.
Dit veroorsaak verstoppings in die pypleiding wat tot oorstromings lei," berig mnr Hill. Daar is opdrag gegee dat die situasie daagliks gemonitor moet word. Boonop moet die inspeksieverslag aan die dienstemoniteringskomitee, wat vir die duur van die somervakansie daagliks vergader, voorgelê word.
Dìt sal bydra dat probleme onmiddellik opgespoor en aangespreek word nog voordat riool op die strand of in die see kan beland.
"Mense swem, salig onbewus van die rioolgevaar, in die see by Diasstrand en eet van die skulpvis wat daar van die rotse gehaal word, ongeag die jarelange en herhalende rioolprobleem."
Dit was in Oktober die mening van die eienaar van Blue Waters langs Louis Fourieweg regoor Diasstrand, mnr Bennie Badenhorst. Toe het die Mossel Bay Advertiser berig dat hy raadop is oor die riool wat "reeds vir etlike jare herhaaldelik in die see vloei."
Diasstrand was vanaf Vrydag 14, tot Woensdag, 19 Oktober vir die publiek gesluit nadat riool oor die pad gespoel het toe 'n garingboomstomp 'n rioolpyplyn verstop en die rioolstelsel oorstroom het. Die strand is nie weer tydens die jongste voorval vir die publiek gesluit nie.
Die Advertiser het verlede week weer besoek aan die area afgelê toe herhaalde berigte ontvang is van riool wat weer deur die stormwatersloot tot op die strand en uiteindelik tot in die see spoel.
Met die Advertiser se besoek tydens laagwater op Donderdag, 1 Desember, het vrotruikende water sterk in die oop stormwatersloot langs Blue Waters af, onderdeur Louis Fourieweg, deur digte riete en tot in rotspoele op Diasstrand gevloei. Op klippe in hierdie poele groei alge welig.
Met 'n opvolgbesoek op Vrydagoggend, 2 Desember, het die vrot rioolwater steeds sterk in die stormwatersloot, waarin talle motorbuitebande, ou winkeltrollies en ander rommel sigbaar was, tot tussen die rotse op die strand gevloei.
Volgens mnr Hill is die situasie sedertdien opgeklaar nadat die versperrings verwyder is.
Die probleem sal finaal opgelos word wanneer behoorlike behuising in Joe Slovo tot stand kom. Na wat verneem word, weier die huidige inwoners egter om te verskuif, wat die behuisingsprojek aansienlik in die wiele ry.
ARTIKEL & FOTO'S: NICKEY LE ROUX, MOSSEL BAY ADVERTISER-NUUSREDAKTEUR
'Ons bring jou die nuutste Mosselbaai, Tuinroete nuus'
