OUDTSHOORN NUUS - Rassistiese kommentaar wat ‘n amptenaar van die Oudtshoorn-munisipalitet op iemand se Facebookblad geplaas het, is besig om landwyd uit te kring.
Die kommentaar is deur Vuyisa Bhefile Ka Hlazo geplaas wat homself op sy eie Facebookblad identifiseer as ‘n administratiewe bestuurder by die munisipaliteit.
Hy is ook bekend as Vuyisa Forplay.
Beide die munisipaliteit en Forplay het reageer op die kommentaar waarin Forplay uitsprake teen witmense maak.
In ‘n verklaring vanaf die munisipaliteit sê die administrateur, Kam Chetty, dat hulle oorval is met oproepe en klagtes oor die aangeleentheid aangesien Vuyisa ‘n munisipale amptenaar is. In die verklaring sê Chetty dat die saak dringend ondersoek word om te bepaal of Vuyisa die skrywer van die kommentaar was en of hy, soos op Facebook gesê word, ‘n bestuurder by die munisipaliteit is.
Chetty het die versekering gegee dat rassisme nie geduld word nie en dat daar geen onderskeid op grond van ras of kleur gemaak word nie.
Vuyisa het in ‘n gesprek met die Oudtshoorn Courant gesê die kommentaar was in woede gelewer op ‘n blad waar daar verskeie kwetsende opmerkings oor swartes gemaak is. Volgens hom blyk dit dat die rassistiese opmerkings op die blad begin het met plasings wat verwys het na die betogings wat tans by universiteite aan die gang is. ‘n Opmerking oor swartes het volgens hom ‘n hele reeks reaksies gehad.
Hy het gesê, “...what was said there was said in anger and frustration and I am trying to find the link on which people can follow the whole conversation which lead to this comment.”
Hy het benadruk dat hy nie ‘n rassis is nie.
Rassistiese kommentaar wat ‘n amptenaar van die Oudtshoorn-munisipalitet op iemand se Facebook-blad geplaas het, is besig om landwyd uit te kring.
ARTIKEL: HANNES VISSER, OUDTSHOORN COURANT-REDAKTEUR
'Ons bring jou die nuutste Klein-Karoo, Hessequa, Tuinroete nuus'
