GEORGE NUUS - Regdeur die jaar hanteer die Dierebeskermingsvereniging (DBV) klagtes van minderjarige kinders wat perde steel, veral in die areas van Pacaltsdorp en Thembalethu.
Volgens Salomé Bruyns, senior inspekteur by die DBV, het hulle 'n paar noodlottige gevalle gekry, waartydens die perde van kant gemaak moes word. "Perde word letterlik gery totdat hulle nie meer kan nie, indien die perd te moeg is om verder te hardloop, word hy met stokke geslaan of die stok word in hul rektum gedruk om hom te forseer om te hardloop," het Bruyns gesê.
Kinders van so jonk as 12 jaar oud, is by hierdie onwettige aktiwiteite betrokke. Alhoewel die DBV regdeur die jaar die klagtes ontvang, vind hulle dat die probleem baie erger tydens skool vakansies is.
Die DBV wil ouers vermaan om meer betrokke by hul kinders se aktiwiteite te wees en te weet waar hulle kinders is. Om ‘n dier voos te ry of te slaan of op enige manier te beseer is ‘n oortreding onder die Dierebeskermingswet, en oortreders sal vervolg word.
"Perde eienaars moet asseblief hul perde snags naby die huise laat wei en die perde nie sonder toesig laat nie," het Bruyns bygevoeg.
Rapporteer dieremishandeling aan die DBV by 044 878 1990 of 082 378 7384 na ure.
'Ons bring jou die nuutste George, Tuinroete nuus'
