Powertown-moorde: Verhoor in hooggeregshof

MOSSELBAAI NUUS - Die hooggeregshofsaak tussen die Staat en Nathan Mowers (22), die man wat daarvan aangekla word dat hy 'n graad 11-leerder van die Groot-Brakrivier Sekondêre Skool, Lesley-Ann Maya vermoor het, het op 27 Februarie in die rondgaande hof op Mosselbaai begin.

Mowers word ook van die verkragting van 'n ander slagoffer, 'n 11-jarige kind aangekla.

Mowers is op 9 Junie 2016 in die aanhoudingselle van die Mosselbaai-streekhof vir die moord van Lesley-Ann in hegtenis geneem, terwyl hy in die hof sou verskyn op die aanklag van verkragting van die 11-jarige kind.

Die arrestasie, deur Mosselbaai-polisie se speurhoof, kapt Tekkie van Rensburg, het gevolg bykans 'n jaar nadat Lesley-Ann se liggaam op 18 April, 2015 tussen riete in Powertown, naby Klein-Brakrivier deur haar ouma gevind is. 'n Nadoodse ondersoek het getoon dat Lesley-Ann verwurg is.

Sy was reeds 'n paar dae vermis toe haar liggaam gevind is.

Die afgelope week het die Staat die verhoor begin deur getuies na die getuiebank te roep. Die pa van Lesley-Ann se 4-jarige kind, Dalian Booysen het onder meer getuig dat hy Lesley-Ann laas op 10 April lewend gesien het. Haar ma, Remona, het die afgelope Woensdag, 1 Maart emosionele getuienis in die hof gelewer. Die regter in die saak is regter ET Steyn. Die saak is op die rol geplaas vir die volgende twee weke.

Verskeie inwoners van Powertown het die hofverrigtinge bygewoon. Die beskuldigde was elke dag netjies geklee en het emosieloos voor hom uitgestaar terwyl die Staat se getuies in die verhoor getuig het.