MOSSELBAAI NUUS - Op Sondag, 6 Desember, word die lewe aan 'n babadogtertjie in Mosselbaai geskenk. Sy weeg net meer as drie kilogram by geboorte.
Haar naelstringetjie is nog vas en die nageboorte kleef aan haar lyf.
Haar mond soek-soek na haar ma se bors wanneer haar ma hoor hoe haar baba haar eerste geluidjies maak.
Die babatjie word egter opgetel, in 'n deurskynende plastieksak gesit en na 'n afgesonderde, beboste gebied in 'n informele nedersetting in KwaNonqaba gedra.
Die weerburo voorspel dit gaan vroeg reeds 24°C warm word.
Die baba lê in die sak. Die ma begin die sak swaai. Die sak vlieg deur die lug in die rigting van bosse en val. 'n Doringtak stuit die val.
Die sak skeur en die babatjie val uit die sak tot op die grond. Soos wat sy val, krap die dorings haar teen haar slaap stukkend.
Bestiering
'n Man van die nedersetting, Zanbile Pawuleni (52) wil kort voor 10:00 toilet toe gaan. Al die beskikbare toilette is beset. Hy besluit om af te stap in die rigting van die bosse om homself daar te gaan verlig.
Hy hurk. Eers dink hy, hy verbeel hom net, maar dan hoor hy dit wéér - 'n baba se huilgeluidjies, hiér, tussen die digte doringbosse naby hom. Zanbile kyk verward rond, hy sien nie 'n ma of 'n baba nie. Dan druk hy 'n paar takke voor hom weg, maar steeds sien hy nie waar die gehuil vandaan kan kom nie.
Die gehuil hou nie op nie en Zanbile spring op en hardloop in die rigting van die huise.
'n Gemeenskap help
Sy asem jaag wanneer hy skree: "Kom, kom help my asseblief, daar huil 'n kind in die bosse!"
Akhona Bota (29) en Sthembile Gojo (27) hoor Zanbile se gille en hardloop saam met hom teen die heuwel af na die bosse waar die huilgeluide steeds opklink.
Die mans staan voor die bosse, kyk verward in die rigting van die huilgeluidjies. Dis eers weer stil. Dan hoor hulle al drie dit weer; die gehuil van 'n baba - diep vanuit die ruie bosse.
Hulle begin naarstiglik soek terwyl die sweet hul aftap. Dis sowat 10:00 en die son bak reeds warm.
Die bosse is te dig en vol dorings, al uitweg vir hulle is om 'n paadjie oop te kap in die rigting vanwaar die huilgeluide kom. Dan, meters verder, kom hulle op die ontstellende gesig af: 'n Pasgebore babadogtertjie wat op die grond lê.
Die plastieksak wat half geskeur aan die doringtak hang is die stille getuienis van waarskynlik die eerste uur van hierdie babatjie se lewe.
Een van die mans bel die polisie en 'n ambulans terwyl Zanbile terug na die huise hardloop en vir 'n paar vroue skree om handdoeke te bring. Die babatjie word opgetel en aan 'n vrou oorhandig wat haar toevou. Die vrou druk die dogtertjie teen haar vas en, vir die eerste keer sedert haar geboorte, hou sy op met huil.
By die Mosselbaai Provinsiale Hospitaal word die babatjie deur dokters ondersoek.
'n Bandjie word om die dogtertjie se armpie gesit. Daarop is geskryf: "Baba Onbekend".
Intussen gee die gemeenskap die kind 'n naam. Hulle doop haar Naledi, wat 'ster' beteken. Kort voor Kersfees is Naledi gebore.
Akhona Bota en Zanbile Pawuleni wys na die bosse waardeur hulle 'n pad moes oopkap om die babadogtertjie op te spoor. Foto: Louise Karsten
"Baba Onbekend" - wat nou?
Wanneer "Baba Onbekend" uit die Mosselbaai Provinsiale Hospitaal ontslaan word, sal die Departement van Maatskaplike Dienste 'n plek van veiligheid vir die baba verkry nadat 'n hofbevel hiervoor uitgereik is.
Veiligheidsouers sal deur maatskaplike werkers gekeur word om die baba vir 'n tydperk van drie maande te versorg.
Wanneer die aanvanklike drie maande-tyd-perk verstryk en die veiligheidsouers nie in pleegsorg sou belangstel nie, of daar steeds geen geskikte familie na vore gekom het om die kind te versorg nie, kan die tydperk by die veiligheidsouers met 'n verdere drie maande verleng word.
Indien die baba in pleegsorg geplaas word, sal dit vir die duur van 'n minimum van twee jaar wees.
Die tydperk kan ook verleng word wanneer die twee jaar verstryk. Die proses kan so verloop tot die kind 18 jaar oud is en self kan besluit waar sy wil woon.
Die familie van 'n kind kry altyd voorkeur wanneer aansoek gedoen word om 'n kind aan te neem, mits die omstandighede by die familie geskik vir aanneming is.
Polisie ondersoek kinderverlating
Die Mosselbaai Gesinsgeweld- Kinderbeskerming- en Seksuele Misdrywe Eenheid ondersoek 'n saak van kinderverlating nadat 'n pasgebore baba in bosse in Gentswanaweg, KwaNonqaba gevind is.
Die baba is op Sondag, 6 Desember, om ongeveer 10:00 deur inwoners van die informele nedersetting gekry. Sy was in 'n plastieksak toegemaak en in die bosse weggegooi.
'n Doring het tydens die val die deursigtige plastieksak oopgeskeur en die kind het uit die sak tot op die grond geval waar 'n man, wat op haar skreegeluidjies reageer het, haar opgespoor het.
Nog niemand is in verband met die voorval gearresteer nie.
Die ondersoekbeampte in die saak is sers Mofokeng. Enigeen met inligting word versoek om haar by 082 335 0686 te skakel.
Sthembile Gojo, Zanbile Pawuleni en Akhona Bota het in die bosse na die kindjie wat hartseer gehuil het, gesoek. Hulle optrede het die weggooi-babadogtertjie se lewe gered.
ARTIKEL EN FOTO'S: LOUISE KASTEN, MOSSEL BAY ADVERTISER JOERNALIS
'Ons bring jou die nuutste Mosselbaai, Tuinroete nuus'
