MOSSELBAAI NUUS & VIDEO - Die brand wat sedert vroeg vanmiddag naby Danabaai gewoed het, het versprei na die klofie in Scabraweg, in die woongebied, waar brandbestryders met die hulp helikopters die brand beveg.
Brandbestryders meen dit sal nog sowat ‘n uur duur om die brand daar ten volle onder beheer te bring. Mosselbaai se nooddienste beveg tans die vure om Danabaai te midde van ‘n sterk Oostewind.
Malvaweg en Nerinaweg is vir verkeer gesluit en na verwagting sal dit vir die volgende uur nog gesluit bly.
Twee huise in P Lorea is deur grondspanne van die brandweerdiens van skade gered. Die toegangspad na Danabaai was vir ‘n kort tydjie vir verkeer gesluit maar is intussen weer heropen.
Die munisipaliteit het bevestig dat geen stappers op die St Blaize wandelroete vasgekeer was nie. Vrese het onstaan nadat geparkeerde voertuie aan die Danabaai-kant van die roete opgespoor is.
Dit blyk dat die eerste brand kort voor 15:00 tussen Danabaai en Pinnacle Point onstaan het. ‘n Verdere brand is na bewering kort daarna naby die Mosselbaai Aftree-oord opgemerk en later die middag het ‘n brand in die klofie by Scabraweg ontstaan. Kort daarna is die hulp van lugsteun ingeroep. Vrese dat woonhuise in gedrang was, het ongegrond geblyk te wees met grondspanne wat hulle uitstekend van hul taak gekwyt het. Berig is ook ontvang dat die Groot-Brakrivier Buurtwag hul hulp kom aanbied het.
Kyk 'n video hieronder.
ARTIKEL & VIDEO: NICKEY LE ROUX, MOSSEL BAY ADVERTISER-NUUSREDAKTEUR
'Ons bring jou die nuutste Mosselbaai, Tuinroete nuus'
