MOSSELBAAI NUUS - Die vlieënier van 'n ligte vliegtuig moes op Dinsdag, 16 Desember, omstreeks 14:10 'n noodlanding op 'n oop stuk veld langs die Herbertsdale-pad buite Mosselbaai uitvoer nadat die vliegtuig, 'n Rockwell Commadore viersitplek, vermoedelik enjinprobleme ondervind het.
Mnr Hans Potgieter, die vlieënier, het aan die Advertiser gesê hy het enkele snye opgedoen waarvoor hy steke ontvang het. Sy vrou, Sharon, word in die Groote Schuur hospitaal in Kaapstad vir 'n saamgeperste fraktuur van die werwelkolom behandel.
"Ek was op pad na die vliegveld om te land toe ek rook in die kajuit opmerk. Ek het onmiddellik die nodige gedoen en vir 'n noodlanding voorberei. My grootste vrees was dat ons die bome op die veld waarin ons geland het, sou tref. Op die oog af mag die veld gelyk voorkom, maar dis klipperig en die oppervlak baie ongelyk. Na die landing het ek Sharon onmiddellik uit die vliegtuig gehelp," het mnr Potgieter gesê.
"Was Hans Potgieter nie so 'n ervare vlieënier nie, was hy en sy bruid van 'n paar weke, Sharon, waarskynlik nie so gelukkig om met enkele beserings uit hierdie ervaring te kom nie," berig 'n omstander wat nie sy naam wou noem nie. Mnr en mev Potgieter is op 1 November getroud.
'n Mede-vlieënier en vriend, mnr Marcel Meiring, het op die toneel aan die Mossel Bay Advertiser mnr Potgieter as een van die mees ervare vlieëniers op Mosselbaai beskryf.
"Ons was drie vliegtuie wat Dinsdagoggend eers na Riversdal en daarna na Stilbaai gevlieg het. Vandaar het Hans 'n direkte roete na Mosselbaai gevolg terwyl ons kuslangs teruggevlieg het," berig mnr Meiring.
Ooggetuie
'n Ooggetuie, Marlene Stephanus, berig dat sy en haar man pas per motor op die Herbertsdale-pad ingedraai het toe hulle die vliegtuig gewaar wat besonder laag gevlieg het. Oomblikke later was daar net stof te sien.
Hulle het hul motor tot stilstand gebring en gesien hoe mnr Potgieter sy vrou uit die vliegtuig help. Sy het om 14:12 haar werkgewer, mev Evelyn Muller, per selfoon probeer kontak. Hulle is daarna na die Muller egpaar se huis vanwaar hulle die noodvoertuie aanwysings gegee het om by die wrak te kom.
Mev Muller berig dat sy binne die huis doenig was toe sy die vliegtuig laag oor haar huis in die rigting van Aalwyndal hoor vlieg het. "Die vlieënier kan baie gelukkig wees dat daar nie beeste was toe die noodlanding uitgevoer is nie, want daar wei talle beeste op daardie grond," het sy aan die koerant berig. Die grond behoort aan mnr Tom Muller, maar word deur tans deur mnr Christo Meyer gebruik.
Mnr Jananco Johannes wat op 'n naasliggende plaas woon, berig dat hulle die vliegtuig laag oor hul huis gehoor vlieg het. "Die volgende oomblik het die enjin uitgesny. Ons het gedink die vliegtuig het dalk see se kant toe gedraai. Toe hoor ons die vliegtuig het geval."
Burgerlugvaart
Mnr Potgieter het bevestig dat die Burgerlugvaart-owerheid die toneel sal besoek vir die regulerende ondersoeke. Met die Advertiser se besoek aan die toneel op Dinsdag-middag het vliegtuigbrandstof nog uit die wrak gelek en het die Mosselbaai Brandweer 'n wakende oog gehou. Die brandweer het die toneel met skuim bespuit om enige moontlike brande te voorkom.
Die vliegtuig se battery is ook verwyder om elektriese kortsluitings te voorkom.
Die KwaNonqaba Polisie het die wrak sedertdien bewaak.
Die KwaNonqaba SAPD ondersoekbeampte, Ao Jerome Malan, ondersoek een van die vliegtuig se wiele. Beide wiele het tydens die noodlanding van die vliegtuig se romp geskeur en het sowat 50 meter van mekaar gelê.
Ooggetuie Marlene Stephanus, links, en haar man, Ghoen, het omstreeks 14:10 gesien hoe die noodlanding uitgevoer word. By haar is haarwerkgewer, Evelyn Muller, se dogter, Michelle.
Die wrak van die Rockwell Commadore viersitplekvliegtuig op 'n veld op die Herbertsdale-pad buite Mosselbaai. Beide die vlieënier, mnr Hans Potgieter, en sy vrou, Sharon, is vir beserings behandel.
ARTIKEL EN FOTO'S: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
