MOSSELBAAI NUUSFLITS - 'n Bus wat in 'n skokkende onpadvaardige toestand van Port Elisabeth na Kaapstad onderweg was, is gister omstreeks 13:15 op die N2 by Voorbaai deur provinsiale verkeersbeamptes van die pad getrek en geskut.
Die voertuig het nie 'n voorruit nie, en soos die voorruit is talle ander ruite met plastiek en swart kleefband toegeplak. 'n Truspieëltjie is afgebreek, sommige van die onderdele is met duct tape-kleefband en toue vasgemaak. Daar is geen ruitveërs nie hoewel die ruitveërenjintjie deurentyd werk.
Provinsiale verkeersinspekteurs Samantha Janse van Rensburg en Siyathemba Nongxaza het op die N2 by Voorbaai patrollie gedoen toe die bus rigting Kaapstad by hulle verby gekruie het. Na wat verstaan word, het die bus teen sowat 50km/h gery.
Die busbestuurder, mnr Josph Manyathi het aan die Mossel Bay Advertiser gesê sy werkgewer het hom opdrag gegee om die bus, wat na bewering 'n paar maande gelede in 'n ongeluk was, Kaapstad toe te neem. Die Afrikaanse eienaar bedryf skynbaar 'n vervoerdiens in die Oos-Kaap.
"Ek het 'n vrou en ses kinders, om my werk te behou moes ek doen wat ek opdrag gegee word om te doen," het mnr Manyathi gesê.
Ondersoekbeampte Gerhard Groenewald het gesê hy het nog nie tevore 'n voertuig in so 'n toestand by die toetsterrein teëgekom nie.
Daar was ook nie sekerheid of die permitte wat die busbestuurder wel in sy besig gehad het, wel vir die betrokke bus uitgereik was nie.
Die busbetuurder bly in die sorg van die verkeersbeamptes tot tyd en wyl die geldigheid van al die betrokke permitte en lisensies nagegaan kan word.
Provinsiale verkeersinspekteur Samantha Janse van Rensburg
ARTIKEL EN FOTO'S: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
