MOSSELBAAI NUUS - Dit blyk asof 'n Danabaaier wie se groot gesukkel wat uiteindelik in 'n regsgeding geëindig het, nie die enigste kliënt van MTN is, wat deur die diensverskaffer ingeloop is nie.
Na aanleiding van 'n artikel in die Mossel Bay Advertiser (Danabaaier ingedoen deur diensverskaffer, 24 Februarie) het verskeie lesers aangedui dat hulle ook nog lank nie die strydbyl met MTN begrawe het nie.
Sedert die vorige artikel se plasing, het Danabaaier Lennis van Schalkwyk sy geld, met 'n bietjie rente van MTN verhaal, maar nie almal wat ingedoen is, was so gelukkig nie.
Een vrou berig dat sy in Julie verlede jaar begin agterkom het dat daar bedrae van R329 en minder van haar rekening gedebiteer word. Sy is egter 'n Vodacom-kliënt en het hieroor navraag gedoen by MTN, Langeberg Mall. Hier moes sy, wat nog nooit met MTN besigheid gedoen het nie, hoor dat sy 'n datarekening by hulle het.
'n Rekening, geregistreer in Durban, is op haar naam en ID-nommer geopen. "Hulle kon my geen meer inligting gee oor hoe dit gebeur het nie, maar net gesê dat hulle dit met hulle bedrogafdeling sal opneem. Ek het ook 'n bedrogsaak by die polisie gemaak."
Drie weke later, het sy weer navraag gedoen en ook die debietorder gestop aangesien 'n nuwe bedrag van haar rekening verhaal is. MTN kon haar weer nie van antwoorde verskaf nie.
Hulle het bloot gesê dat hulle haar rekeningbesonderhede sou verwyder en die metode van betaling na kontant sou verander. Maande later toe sy 'n rekening by 'n klerewinkel wou open, kon sy dit egter nie doen nie, aangesien die kredietstelsel getoon het dat sy MTN geld skuld.
"Hierdie keer was dit 'n ander nommer as wat aanvanklik met my eerste klagte deur MTN aan my verskaf is. Weer is ek belowe dat hulle dit sou opneem en tot vandag toe, nog geen terugvoering nie." Vir 'n periode van drie maande in 2016, berig nog 'n Vodacom-kliënt, is 'n bedrag van ongeveer R500 per maand per debietorder uit sy bankrekening verhaal. "Ek moes 'n bedrogsaak by die polisie gaan aanmeld.
Iemand, in Pinetown, het met al my besonderhede 'n rekening by MTN gaan oopmaak. Na drie maande is die debietorders uiteindelik gestaak, maar die geld is nooit aan my terugbetaal nie."
'n Twee-en-sewentigjarige man wat al meer as 15 jaar 'n kliënt van MTN is berig dat sedert sy laaste kontrakopgradering, daar gedurende die afgelope jaar debietorders van tussen R400-R4 000 van sy bankrekening verhaal is.
"Daar is betalings sonder ons goedkeuring asook data deur vreemdes gekoop. Ons het erkenning van ontvangs van ons klagte per e-pos, maar niks verder nie," het hy aan die Advertiser berig.
'n Ander kliënt vertel dat sy haar MTN-kontrak op 28 Maart 2016 gekanselleer het omdat die kontrakperiode verwys was. "Na vele besoeke aan die tak in die Mosselbaai Mall, Heiderand het daar nooit iets gebeur nie en die geld is steeds afgetrek van ons bankrekening."
Kliëntediens is gekontak, maar geen vordering is gemaak nie. "Ons het sover gegaan om die aftrekorder by die bank te gaan stop, maar dan het hulle die volgende maand net die vorige maand se bedrag bygetel en afgetrek. Aangesien die bedrae wissel, stop die bank dit dan nie outomaties nie. Ek en my man was male sonder tal by die MTN in Mosselbaai Mall. Die vrou daar het toe self 'n e-pos aan MTN gestuur waarna die aftrekkings gestop het, maar die geld is nooit terugbetaal nie."
Nog 'n kliënt se kontrak wat R105 per maand sou beloop, se rekening is in Februarie 2016 met R7 000 gedebiteer.
"Ek was so geskok en is dadelik na die Langeberg-tak toe. Geen hulp. Hulle het net gesê net dat ek 5G se data gebruik het. Ons het egter 'n soft lock op ons kontrak, wat beteken dat wanneer jou 2G data opgebruik het, jy nog data kan koop."
Toe die kliënt hieroor navraag doen, is sy vertel dat die soft lock afgehaal is. "Niemand neem daarvoor verantwoordelikheid nie. Hulle kon ook nie verduidelik hoe 5G data R7 000 kon kos nie. Na vele e-posse het ek nog geen terugvoer ontvang nie. Dis nou 'n jaar later."
'n Joernalis by die Mossel Bay Advertiser het ook 'n bloutjie met MTN geloop. Toe haar kontrak in Augustus 2016 ten einde loop, het sy dit nie hernu nie. Debietorders is egter steeds van haar rekening gevorder en het haar genoop om dit by die bank te staak.
"Alhoewel ek die aftrekkings gestop het, sou dit dan na 'n maand of twee net duddeld afgetrek word. My oproepe na MTN het geen vrugte afgewerp nie en hulle was uiters onbehulpsaam."
Ten einde raad, het sy verlede Donderdag 'n navraag gelaat op die aanlyn-verbruikersplatform HelloPeter. Daar was 'n legio klagtes oor MTN en probleme met wederregtelike aftrekkings, soortgelyk aan hare.
Die goeie nuus is egter dat sy binne 12 minute nadat sy die navraag aanlyn gelaai het, 'n oproep van 'n MTN-konsultant ontvang het, wat beloof het om die debietorder te stop en die fondse wat wederregtelik verhaal is, terug te betaal.
Tot dusver was daar egter nog geen sprake van geld wat deur MTN in haar bankrekening terugbetaal is nie.
ARTIKEL: CORNELLE CARSTENS, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
