MOSSELBAAI NUUS - Die Mosselbaai-munisipaliteit wil die ryk bron van deskundigheid in die gemeenskap, veral onder die afgetredenes, ontgin, en rig 'n uitnodiging aan mense wat bereid is om te dien in raadgewende panele wat die munisipaliteit gaan skep, om hul CV's aan die munisipale bestuurder te stuur.
Die munisipaliteit sê in 'n verklaring dit is bewus van 'n rykdom aan deskundigheid en ondervinding wat in die groter Mosselbaai-gebied beskikbaar is, veral onder die afgetredenes.
Hierdie deskundigheid kan goed aangewend word om die munisipaliteit in staat te stel om sy doelwitte van volgehoue uitnemendheid in dienslewering asook status as een van Suid-Afrika se leidende munisipaliteite te handhaaf.
Die munisipaliteit nooi gevolglik vrywilligers wat bereid is om te dien in enige van die panele, wat die munisipaliteit beplan om te skep met betrekking tot bedryfs- asook verwante beplanningsaangeleenthede asook om as klankborde vir die Raad en bestuur, om hul CV's teen nie later as 31 Mei 2017 nie aan die munisipale bestuurder te stuur by Posbus 29, Mosselbaai, 6506, of per e-pos.
Hoewel 'n aanvanklike sperdatum gestel, sal die munisipaliteit ook oorweging daaraan gee om enige ander tyd bykomende aanstellings te maak.
Afhangende van die aansoeke wat ontvang word, word die volgende velde deur die munisipaliteit oorweeg:
- Bestuur van vaste afval, met spesifieke verwysing na vermindering, hergebruik en herwinning.
- Die beskerming en beveiliging van munisipale eiendom teen die agtergrond van kabeldiefstal, metaalvoorwerpe en moontlike oproer.
- IT-bestuur, strategiese beleide, implementering en toegangsbeheer.
- Natuurbewaring.
- Plaaslike toerisme-ontwikkeling.
- Plaaslike ekonomiese ontwikkeling, onder meer die vestiging van 'n heuningbosbedryf.
- Groen energie.
- Dissiplinêre verhore.
Die panele sal suiwer in 'n raadgewende hoedanigheid optree, en nie besluitnemingsmagte hê nie. Hulle sal ook nie bestaande strukture soos wykskomitees vervang of hul werksaamhede dupliseer nie. Dit sal 'n vrywilligerprogram wees met geen vergoeding daaraan verbonde nie.
Dit word beoog om die panele hoogstens kwartaalliks te laat vergader, of op 'n ad hoc-basis by wyse van 'n spesiale reëling indien nodig.
Meer inligting in die verband kan van die kantoor van die munisipale bestuurder by telefoon (044 606-5003) verkry word.
'Ons bring jou die nuutste Mosselbaai, Tuinroete nuus'
