MOSSELBAAI NUUS - Eskom het pas die gewysigde skedule vir beurtkragonderbrekings, wat met ingang 1 Julie van krag geword het, bekendgestel.
Waar die vorige skedule 'n redelike mate van voorspelbaarheid behels het, is die doel van die nuwe skedule om die onderbekings meer ewe-redig oor die hele Suid-Afrika te versprei en is dit juis nie op voorspelbaarheid ingestel nie.
Kort op die hakke van die nuwe skedules, het die vakverbond Solidariteit, in samewerking met Maroela Media, 'n noodplan vir 'n langdurige kragonderbreking van twee weke of langer geloods.
Dit volg op soortgelyke noodplanne deur die Kaapstadse Metro en ander owerhede wat vir die ergste scenario hul voorbereidings bekend gemaak het.
Energie analis mnr Ted Blom het tydens die onlangse Nasionale Energiereguleerder van SA (Nersa) se 'n openbare verhoor in Johannesburg oor Eskom se aansoek vir 'n verdere verhoging in tariewe die mening uitgespreek dat die kans op langdurige onderbrekings soveel soos 50% is.
Die Mosselbaai Munisipaliteit se woordvoerder, mnr Harry Hill, berig die munisipaliteit het reeds in April 2015 'n omvattende gebeurlikheidsplan vir die gebeurlikheid van 'n langdurige kragonderbreking opgestel.
"Die doel van hierdie plan is om 'n geïntregreerde reaksie in plek te stel om die effek van 'n langdurige impak op die munisipaliteit se bedrywighede en dienslewering te minimiseer. Die plan maak voorsiening daarvoor dat ander relevante plaaslike en streeksrolspelers betrek word.
"Afhangende van die ernstigheidsgraad, sal 'n Gesamentlike Operasiesentrum, beman deur senior munisipale personeel en ander rolspelers soos die SAPD, onmiddellik geaktiveer word.
"Behalwe die gebruik van kragopwekkers en UPS-stelsels, maak die plan onder meer voorsiening dat watertenkwaens op gereedheid-grondslag geplaas word om water aan woonbuurte te verskaf indien nodig; nooddamme by rioolsuiweringsaanlegte geskep word om oorvloei van riool sover moontlik in toom te hou; rioolverwyderingskontrakteurs op bystand geplaas word; voorsiening gemaak word dat alle essensiële voertuie genoeg brandstof het en nie-essensiële voertuie aan diens onttrek word; en dat sekuriteitsdienste by sekere aanlegte versterk word.
Indien nodig, maak die plan ook daarvoor voorsiening dat streng waterbeperkings ingestel word."
Mnr Hill het bygevoeg dat die musipaliteit 'n lys byhou van relevante rolspelers met opgedateerde kontakbesonderhede sodat hulle dringend betrek kan word, indien nodig.
Solidariteit se Navorsingsinstituut het die noodplan opgestel met die verwagting dat Eskom se netwerkineenstorting tot twee weke kan duur.
Die werklike onderbreking mag korter of langer duur, veral in ag genome kabeldiefstal. Dit maak voorsiening vir reëlings vir beide voor die tyd en tydens 'n kragonderbreking. Dit onderskei ook tussen prioriteit en bykomende reëlings.
Baie van die voorstelle kan egter toegepas word, ongeag die duur van 'n kragonderbreking, en fokus op onder meer die beplanning vir logistiek, water en voedselvoorsiening, veiligheid en sekuriteit, vervoer en kommunikasie.
"Die publiek sal tot 'n groot mate op hulself aangewese wees sou so iets gebeur en moet daarom voorbereid wees daarop. Selfs al gebeur dit nie, is dit steeds in die publiek se belang om proaktief op te tree.
"Ons wil met dié noodplan ons lede en die algemene publiek help om self ook voorbereid te wees sodat daar nie rede vir paniek hoef te wees as Eskom wel vir 'n week of twee geen krag lewer nie," sê Piet le Roux, hoof van die Solidariteit Navorsingsinstituut.
Om 'n afskrif van die plan te bekom, besoek http://bit.ly/1LKMmKw
ARTIKEL: NICKEY LE ROUX, MOSSEL BAY ADVERTISER - JOERNALIS.
'Ons bring jou die nuutste Mosselbaai, tuinroete nuus'
