MOSSELBAAI NUUS - 'n Man van Mosselbaai se voertuig is soek nadat dit, soos sy gewoonte was terwyl hy uitstedig is, vir 'n tydperk by 'n vulstasie in Voorbaai geparkeer was.
Die bejaarde man het na Kaapstad gereis per bus en sy voertuig, 'n Toyota Corolla by die Shell Truckport in Voorbaai geparkeer op Donderdag, 6 Oktober omstreeks 12:15.
Met sy terugkeer vanaf Kaapstad op 18 Oktober was die voertuig nie meer waar hy dit geparkeer het nie. By navraag, het hy uitgevind dat die bestuurder van die vulstasie die voertuig na 'n ander perseel verskuif het, van waar dit glo verdwyn het.
Die voertuig se registrasienommer is CL 35588. Dit is 'n ligblou 1300 2l Toyota Corolla.
'n Saak van motordiefstal is by die Da Gamaskop-polisiestasie aangemeld. Enige persoon met inligting rakende die voertuig en die voorval kan EJ Meyer kontak (071 911 5567).
Die bestuurder van die Shell Truckport, Werner Morkel-Brink het by navraag oor die voorval aan die Mossel Bay Advertiser gesê dat dit gereeld gebeur dat voertuie vir lang tye op die vulstasie se perseel geparkeer staan. Volgens Morkel-Brink is daar slegs 40 parkeerplekke wat optimaal funksioneer, mits voertuie vir kort tydperke daar parkeer.
"Ons onderneming is baie besig vanweë die aard van ons besigheid. In 'n poging om die las op die beskikbare parkeerplek te verlig, het van die personeel al begin saamry werk toe in een voertuig," verduidelik Morkel-Brink. Bo en behalwe die vulstasie, is daar ook kitskosrestaurante en 'n geriefswinkel op die perseel.
Dit dien ook as 'n besprekingskantoor vir verskeie busdienste en dies meer. Verskeie busdienste vertrek ook vanaf die perseel.
"Dit gebeur dikwels dat voertuie geparkeer staan waar van die Shell-onderhoudseenhede wat van die Kaap af kom moet staan om noodsaaklike werk te doen. In sulke gevalle moes ons al voertuie laat wegsleep."
Wat betref die verwydering van die Toyota Corolla waaroor berig word, het die voertuig aldus Morkel-Brink verskeie dae in die parkering reg voor Steers-restaurant gestaan. Hy verduidelik dat hy die besonderhede van die eienaar bekom het en hom telefonies versoek het om die voertuig dringend te skuif, aangesien dit geparkeer was op 'n oppervlak waar 'n onderhoudseenheid wat uit die Kaap verwag is, sou moes staan.
"Toe die eienaar nie reageer nie en ons die onderhoudswerk reeds met 'n dag uitgestel het om die man te akkommodeer, was ek genoop om die voertuig te skuif."
Volgens Morkel-Smith het hy ander Toyota-sleutels gebruik om die voertuig mee oop- en aan te sluit en het dit toe in Rooken-Smithstraat, in 'n munisipale area naby 'n nutsonderneming geparkeer. Na bewering is die voertuig hiervandaan, vermoedelik wederregtelik, verwyder.
"Ons kom graag die publiek tegemoet wat die parkering van hulle voertuie betref, mits daar vooraf 'n reëling getref kan word en dan verkieslik op uitsondering," sê Morkel-Brink. Hy verduidelik dat, indien dit anders gedoen word, dit die dienslewering van sy onderneming negatief beïnvloed.
Hierdie Toyota Corolla is vermoedelik gesteel nadat dit vir 'n lang tyd op 'n perseel in Voorbaai geparkeer was.
'Ons bring jou die nuutste Mosselbaai, Tuinroete nuus'
