HARTENBOS NUUS - Kommer word toenemend gelug oor die stygende watervlak van die Hartenbosrivier, te meer omdat die munisipaliteit toestemming geweier word om die riviermonding oop te maak.
Nie meer net die waterkwaliteit nie, ook die watervlak noop volgens kenners ingryping.
Die voorsitter van die Hartenbos Rivierforum, Kobus Neethling sê die watervlak styg reeds sedert Februarie en dat die rivier onlangs sy walle begin oorstroom het. Oewerbewoners en die Hartenbos Rivierforum het in die onlangse verlede herhaalde beroepe op die Mosselbaai-munisipaliteit en die betrokke staatsdepartemente gedoen om die rivier behoorlik meganies oop te maak.
Oewerbewoners is ontevrede met die onderskeie departemente se gesloer. Hulle vra tereg of eiendomme eers moet oorstroom alvorens amptenare van dié departemente die munisipaliteit sal toestemming gee om die monding oop te maak.
Vroeg vandeesmaand het inwoners reg in eie hande geneem en die riviermond self oopgegrawe. Kenners meen egter dat die rivier op die verkeerde plek oopgegrawe is en dat die seewater deur 'n duin verhoed word om in die riviermond op te stoot en met die nodige skuuraksie die monding skoon en oop te hou.
Die Mosselbaai-munisipaliteit het verlede week die onderskeie departemente om toestemming genader om die riviermonding oop te maak. Hierdie versoek, vergesel van die nodige foto's as bewyse van die stygende watervlak en die waarskynlike risiko van oorstromings vir oewerbewoners, is na wat verneem word deur die departement van omgewingsake afgekeur.
Die munisipaliteit het Dinsdag verteenwoordigers van die departement omgewingsake op 'n terreinbesoek vergesel en opnuut 'n aansoek ingedien om die monding oop te maak weens die gevaar van oorstromings.
Departementele verteenwoordigers meen skynbaar dat geen eiendomme tans die risiko loop om oorstroom te word nie.
Intussen word talle vrae gevra rakende die oorsprong van die water wat die riviervlak gevaarlik laat styg.
"Die riviermonding vul wanneer die mond toegemaak word, aangesien daar daagliks ongeveer 8 miljoen liter per dag gesuiwerde water uitvloei na die riviermonding. Daarbenewens, wanneer dit reën, vloei stormwater in die riviermonding. Boonop is 'n 'n geringe invloei vanuit die opvangsgebied.
Daar is niks wat die munisipaliteit kan doen om te verhoed dat die riviermonding vul wanneer die mond gesluit word nie, behalwe om die deur te breek see toe. Dit is soos 'n bad met die prop in en die kraan is oop. Ons kan nie die kraan afdraai nie, om dus te voorkom dat die bad oorloop, moet ons die prop trek," verduidelik mnr Warren Manuel, die munisipale omgewingsbeampte.
Die effektiewe bestuur van die rivier word ook deur inwoners in die omgewing en geregistreerde belanghebbendes in twyfel getrek.
Hulle meen die oopmaak van die riviermonding het in die verlede die rivier se ekosisteem gebaat, maar dat heersende toestande die natuurlike rivierlewe stadigaan laat uitsterf en dat dit deur indringerspesies vervang word.
Ingeligte belanghebbendes meen die departement van waterwese en sanitasie se besluit etlike jare gelede om karpspesies in die Hartebeeskuildam toe te laat, het bygedra tot die karp wat tans in die laer dele van die rivier en in die monding voorkom. Enkele flaminke is wel onlangs in die riviermonding opgemerk.
"Die Hartenbos Rivierforum is geregistreer as een van die belanghebbende partye wat 'n belang het in die besluitneming oor en die bestuur van die Hartenbosrivier. Die forum word egter geïgnoreer en geensins geken in departementele besluite oor die rivier nie.
Besluitneming vind eensydig plaas deur net die betrokke staatsdepartemente. Verteenwoordigers van die betrokke staatsdepartemente het trouens nie eers opgedaag nie by die laaste twee forumvergaderings in Februarie en Mei waar besluitneming oor die bestuur van die rivier met alle betrokkenes plaasvind," aldus mnr Neethling.
Hy sê dat twee dokumente die bestuur van die rivier rig, naamlik die Estuary Management Plan (EMP), oftewel die riviermondingsbestuurspan, en die Maintenance Management Plan (MMP), oftewel instandhoudingsbestuurspan.
Beide hierdie dokumente vereis deelnemende bestuur en die betrokkenheid van geregistreerde belangegroepe by besluite oor onder meer die opening van die riviermonding.
Hoewel die dokumente deur die Mosselbaai-munisipaliteit erken en geïmplementeer word, meen Neethling dit het geen regsgeldigheid nie omdat versoeke om dit te wysig om vir rampbestuur voorsiening te maak skynbaar nog nie deur die departement van omgewingsake aanvaar of afgeteken is nie.
Intussen versuur die groot getalle muggies en muskiete sedert Desember steeds diegene wat naby die rivier woon se lewens omdat hul natuurlike vyande nie meer algemeen in die natuur voorkom nie.
Na hernude versoeke van die Mosselbaai munisipaliteit en volgehoue druk deur die Hartebos Rivierforum, het die departement omgewingsake gisteroggend toestemming verleen om die riviermonding te laat oopmaak.
Omstreeks 14:00 was, met behulp van die Mosselbaai munisipaliteit, meganiese toerusting op die strand en is met die oopgrawe ‘n aanvang geneem sodat optimal gebruik gemaak kon word van die hooggety wat daarna sou volg.
Verteenwoordigers van die munisipaliteit en die Hartenbos Rivierforum was op die strand om gebeure te monitor en het berig dat die rivier om 16:06 na die see deurgebreek het.
Omstreeks 14:00 was, met behulp van die Mosselbaai munisipaliteit, meganiese toerusting op die strand en is met die oopgrawe ‘n aanvang geneem sodat optimal gebruik gemaak kon word van die hooggety wat daarna sou volg.
Verteenwoordigers van die munisipaliteit en die Hartenbos Rivierforum was op die strand om gebeure te monitor en het berig dat die rivier om 16:06 na die see deurgebreek het.
Dit is duidelik dat die watervlak van die Hartenbosrivier wat sy walle oorstroom oewerbewoners rede tot kommer gee.
Die Hartenbosrivier het sedert verlede week sy walle begin oorstroom.
ARTIKEL & FOTO'S: NICKEY LE ROUX, MOSSEL BAY ADVERTISER-NUUSREDAKTEUR
'Ons bring jou die nuutste Hartenbos, Tuinroete nuus'
