MOSSELBAAI NUUS - Die afgelope week het sowat 40 klein karet-seeskilpaaie (Caretta caretta) na rowwe seetoestande op Mosselbaaise en omliggende strande uitgespoel.
Inwoners, vrywilligers van die mariene protokol forum en personeel van veral die Fransmanshoek bewaringsgebied, het die hulpelose skilpaaie opgetel en hulle na dr Frans de Graaff, bekende plaaslike veearts, geneem.
Karet-skilpaaie, algemeen bekend as loggerheads, handhaaf 'n lae reproduktiwiteit.
Die wyfie lê ongeveer elke twee tot drie jaar 'n gemiddeld van 439 eiers in 3.9 sarsies met tussenposes van 12 tot 17 dae. Hulle broei uit na sowat 80 dae.
Die geslag van die skilpaaie word bepaal deur die temperatuur van die nes; wyfies vorm teen ongeveer 32° grade en mannetjies teen ongeveer 28° grade Celsius. Hulle kan tot 67 jaar oud word en bereik eers seksuele volwassenheid tussen 17 en 33 jaar.
Die uitgespoelde skilpaaie weeg ongeveer 30 gram.
Baie van hulle het duidelik lanklaas geëet en was redelik swak. Sommige was ook oortrek met parasiete en skulpdiere. Laasgenoemde het daartoe bygedra dat die skilpaaie amper dubbel hulle gewig moes dra wat die afduik om na hul gunsteling voedsel (jellievis en bloublasies) te soek, feitlik onmoontlik gemaak het. Daar was ook talle wat die prooi was van seevoëls of krappe, beseer is en nou met halwe vinne oor die weg moet kom.
Hulle word tans gevoer met mossels en rooi aas en die sterkstes is alreeds onderweg na die Two Oceans-akwarium in Kaapstad vanwaar hulle vrygelaat sal word as hulle sowat 400 gram weeg.
Die skilpaaie broei aan die Natalse Noordkus uit en beweeg dan in die Agulhas-seestroom af. Die uitspoel van die skilpaaie is 'n jaarlikse gebeurtenis, veral as daar vroeë kouefronte deurkom. Die watertemperatuur daal te vinnig en hulle raak hipotermies en met die ekstra las van bakterieë en skulpdiere, is hulle te swak om in die koue seestrome te oorleef.
Karet-skilpaaie is 'n bedreigde spesie en word deur wetgewing en streng protokol beskerm. Daarom is dit onwettig om die gestrande skilpaaie in gevangeskap aan te hou en alle skilpaaie moet aan die owerhede gerapporteer word.
Indien skilpaaie op strande teëgekom word, geld die volgende:
Moenie die skilpad in die see terugplaas nie
Plaas die skilpad op 'n klam handdoek of sagte lap in 'n houer met voldoende lug by kamertemperatuur
- Die Dias Skulpmuseum en -akwarium (044 691 1032)
- Dr De Graaff van Hartenbos Dierehospitaal, Hartenbosheuwels (044 695 1086)
- Tersia Marais van die mariene protokol forum (072 227 4715)
- NSRI (082 990 5954)
Die skilpad links is bedek met wit mossels en ander skulpdiere. Die wit gedeeltes op die skilpadjie (regs) is parasiete. In beide gevalle beïnvloed die toestande die skilpad se vermoë om kos te vang wat hulle dan swak maak en op strande laat uitspoel, veral in stormagtige seetoestande
Die wit mossels en ander skulpdiere op die skilpaaie is suksesvol deur dr Frans de Graaff verwyder.
Klik hier vir vorige artikels:
ARTIKEL EN FOTO'S: TERSIA MARAIS
'Ons bring jou die nuutste Mosselbaai, Tuinroete nuus'
