MOSSELBAAI NUUS - Weer eens was 'n Mosselbaaier die afgelope naweek die slagoffer van 'n gewapende aanval, op Louis Fourieweg, duskant Diasstrand.
Verskeie vakansiegangers en inwoners, asook die nuusredakteur van die Mossel Bay Advertiser, is die afgelope paar maande in dieselfde omgewing, helderoordag aangeval en van hul besittings beroof.
Op Sondag, 5 Februarie, het fietsryer, Lydia de Lange (59) met haar fiets om 07:15 teen 35km per uur op Louis Fourieweg, naby die Blue Waters-huis gery, toe twee mans haar fiets onder haar uitgeruk het.
Omdat Lydia bewus daarvan is dat die gebied in 'n misdaadnes ontaard het, het haar man, Wessel, met sy bakkie 'n paar meter vooruitgery en haar in sy tru-spieël dopgehou. 'n Steeds getraumatiseerde Lydia het op Maandag, 6 Februarie, terwyl sy op X-strale gewag het, met die Mossel Bay Advertiser gesels.
"Ek het gery en die volgende oomblik het twee mans in die pad voor my gestaan en letterlik my fiets onder my uitgeruk. Ek het met 'n harde slag die teer getref en kon hoor hoe my fietsryhelm klap soos my kop die teer tref. My man het gestop en geskee waarna een van die mans weggehardloop het.
"Hy was egter 'n ent van my af weg. Die ander man het my egter herhaaldelik geskop en my selfoon, wat in 'n zip-sakkie in my hemp was, probeer kry. Ek kon egter nie omdraai om dit vir hom te gee nie omdat my kop en rug vreeslik seer was. Dis toe wat hy 'n mes uitpluk en bo-oor my staan met die mes in sy hand."
Lydia sê sy het gedink die man gaan haar met die mes steek, toe daar uit die niet 'n man op hulle afstorm en die verdagte van haar afskop. "Die man het hom van my afgeskop, waarna die verdagte weggehardloop het. Die man, wat by Shell-vulstasie werk, het my lewe gered." Volgens Lydia het die mans nie in haar fiets belangestel nie, maar slegs in haar selfoon.
"Voertuie het by die toneel gestop en motoriste het die man agterna probeer sit, maar hy het teen die heuwel uitgehardloop." Lydia se broer, Marius van der Mescht van Monties Fietsrywinkel op Mosselbaai, was self 'n jaar gelede die slagoffer van 'n aanval in dieselfde gebied.
"Iets sal dringend aan hierdie misdaadnes gedoen moet word. Hoeveel mense moet aangeval word voordat wetstoepassers optree? 'n Fietsryer gaan nog baie seerkry as daar nie opgetree word nie."
Dit is intussen duidelik dat Mosselbaaiers bewus raak van die probleemgebied.
Tydens die Mossel Bay Advertiser se fotosessie langs Louis Fourieweg het 'n motoris gestop om te vra of redaksielede bewus daarvan is dat dit 'n gevaarlike gebied is. Lydia sê: "Al is almal bewus van die probleemgebied, is dit steeds 'n pad wat drawwers, fietsryers, voetgangers en vakansiegangers daagliks gebruik.
Die vraag is: "Wat gaan aan die probleem gedoen word?"
Klik hier vir verwante artikels:
- Vakansiegangers by misdaad-brandpunt beroof
- Joernalis net nog 'n misdaadslagoffer
- Kapers op Louis Fourieweg bedrywig
ARTIKEL: LOUISE KARSTEN, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
