MOSSELBAAI NUUS - Sy dink nog nie regtig aan haarself as 'n nasionale kampioen nie, maar voor sy na Gender Links se nasionale beraad vir geslagsgelykeheid vertrek het, het Rita Kayster gesê, "Ek gaan Johannesburg toe en ek kom nie terug sonder 'n toekenning nie."
Rita is reeds die afgelope nege jaar betrokke by die Piet Julies MIV/Vigs-aksiegroep, waar sy tans 'n programbestuurder is. Voorheen het sy lank by 'n plaaslike hotel gewerk en toe oornag, na 12 jaar diens, net gehoor dat daar nie meer vir haar werk is nie.
Sy was 18 maande werkloos, maar het 'n besluit geneem dat sy nie werk sou aanvaar tensy dit iets sou wees waarin sy werklik 'n verskil in haar gemeenskap sou kon maak nie. Juis in daardie tyd het die Piet Julies MIV/Vigs-aksiegroep sy beslag gekry en moes 'n kantoor opgesit word.
Rita is toe, danksy die aanmoediging van goeie vriende, aangewys as die ideale kandidaat.
Gulde geleentheid
"Dit was die geleentheid waaroor ek gebid het."
Van 'n organisasie wat onstaan het uit R250 uit die boedel van Piet Julies, die eerste slagoffer van Vigs in Mosselbaai, wat openlik sy status bekendgemaak het, het die Piet Julies MIV/Vigs-aksiegroep verlede jaar 'n omset van R1.2-miljoen gehad, vertel Rita.
Rita meen dat die ondersteuning van die Mosselbaai Munisipalteit onmisbaar is. Ook die Garden Route Casino-gemeenskapstrust is 'n reddingsboei, aangesien hulle jaarliks ruim bydra tot die skoleprojek, waarvolgens skooluniforms aan kwesbare kinders verskaf word.
Rita sê sy doen wat sy doen omdat sy glo in genesing.
"Daar is min dinge wat my gelukkiger maak as wanneer ons 'n verwysing kry en 'n kliënt met 'n rolstoel en baie siek hier ingestoot word. Dan begin ons werk. En soms maande daarna, kom daardie selfde mense terug, letterlik 'n ander mens."
'n Tweede kans
Zoleka Mabuto, voorheen 'n kliënt en vandag 'n fasiliteerder by die organisasie, se storie is só.
"Ek het in 2007 'n groepie by Piet Julies begin bywoon. Ek glo ek het gesond geword omdat ek soos 'n mens behandel en aanvaar is en nie soos 'n sieke hanteer en verwerp is nie."
Vandag leef Zoleka haar ten volle uit in haar werk en geniet sy veral om met die kinders van die Ithemba Kids te werk. Hierdie groep is saamgestel uit kinders wat geraak word deur MIV/Vigs, asook ander weerlose kinders.
Zoleka glo dat die Piet Julie MIV/Vigs-aksiegroep besonderse werk in die gemeenskap verrig, omdat die mense hulle vertrou.
Enige persoon wat graag een van die Ithemba Kids, waaronder 'n paar belowende gimnaste en ander atlete is, sou wou borg, kan Rita Kayster kontak by 076 981 3599.
ARTIKEL EN FOTO: CORNELLE CARSTENS, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
