MOSSELBAAI NUUS & VIDEO - “Saam kan ons ‘n verskil maak aan die lewensomstandighede van al ons inwoners, ek daag alle besighede en inwoners uit om nie net vanaand in groot getalle by die Walvissaal saam te trek vir die aankondiging van die 2017 Kwêla Dorp van die Jaar nie, maar om van hul klere waarvoor hulle nie meer nut het nie, saam te bring sodat dit aan minderbevoorregtes versprei kan word,” nooi Fanus Truter, voorsitter van die Mosselbaai Besigheidskamer.
“Juis ons omgee is wat Mosselbaai van ander dorpe onderskei.”
Mosselbaai gaan groot in afwagting van die Kwêla Dorp van die Jaar aankondiging wat vanaand in die Walvissaal, en nie meer by die Hartenbos Seefront nie, op ‘n grootskerm uitgesaai gaan word.
Inwoners word uitgedaag om in die gees van die feesvieringe vanaand ou klere en/of komberse saam te bring vir behoeftige persone. Hierdie inisiatief deur die Mosselbaai Besigheidskamer wil probeer om te midde van die groot storm wat die Wes-Kaap getref het, uit te reik na mense wat dit werklik moeilik het.
So, terwyl daar in ‘n jolige stemming feesgevier en waarskynlik gejuig gaan word in afwagting op die aankondiging dat Mosselbaai, wat in die finaal teen Mbombela/Nelspruit en Barclay-Oos meegeding het, hopelik as die 2017 Dorp van die jaar gekroon gaan word, dink ook vir ‘n oomblik net watter voorreg dit is om in Mosselbaai te woon en werk, en skenk ruim aan diegene wat dit nie so breed het nie.
Kyk 'n video hieronder:
