MOSSELBAAI NUUS - Die Mossel Bay Advertiser het na aanleiding van die onlangse moord op spotprentkunstenaars by die tydskrif Charlie Hebdo in Parys, ons eie spotprentkunstenaar, Blackie Swart, se mening oor persvryheid en die voorval gevra. Blackie woon in Groot-Brakrivier en teken die afgelope paar maande weekliks 'n spotprent vir die koerant. Hier volg wat hy te sê het:
Die dodelike en lafhartige aanval op die kantore van die satiriese tydskrif Charlie Hebdo in Parys Frankryk, het weer die debat rondom persvryheid, vryheid van spraak en vryheid van uitdrukking laat opvlam.
Ek noem dit lafhartig, want om weerlose mense koelbloedig dood te skiet net omdat hulle nie dieselfde siening of geloof as jy het nie, verdien sekerlik nie 'n medalje vir dapperheid nie en is nie aanvaarbaar in enige samelewing nie.
Die lewe is soms so donker en nuusberigte so negatief, dat die waarde van 'n goeie spotprent nie onderskat moet word nie. 'n Spotprent wat sekere gebeurtenisse of die optredes van mense op satiriese wyse blootstel, spoor 'n leser aan om sy eie mening te vorm en saam te gesels en te lag oor gebeure.
So ook verskaf die optredes van komediante ure se pret aan gehore en kom die vryheid van spraak tot sy reg. Debatte wat handel oor die optredes van mense of gebeure bevorder kennis en laat individue besef dat daar ander sienings ook bestaan en dat dit gerespekteer moet word.
Ek huldig die mening dat 'n persoon wat deur sy eie optrede of uitsprake die spot mee gedryf word in 'n spotprent, op die verhoog of in 'n debat, sy pak soos 'n man moet vat, want hy of sy is meestal self daarvoor verantwoordelik. In ons land gebeur daar daagliks so baie dinge waaroor gespot of gehuil kan word dat dit 'n onuitputlike bron verskaf vir die media, verhoog en debatvoerders.
In die wêreld is soveel politieke en ander narre wat dit verdien om blootgestel te word en dit sal 'n hartseer dag wees as vrees en intimidasie kunstenaars verhinder om hulle menings te lug.
So het die kunstenaar ook 'n verantwoordelikheid om nie lasterlik te wees of sy leser en toeskouer se intelligensie te onderskat nie.
'n Bietjie humor kan geen mens kwaad doen nie.
Blackie Swart
'Ons bring jou die nuutste Mosselbaai, Tuinroete nuus'
