Die brandbestryders, wie se onbaatsugtige diens aan die gemeenskap reeds onteenseglik bewys is in die hantering van die massiewe veldbrande van die onlangse verlede, gaan as deel van ‘n groter saamtrek van die Suid-Kaapse vertakking van die SUID-AFRIKAANSE NOODDIENSTE INSTITUUT in samewerking met ander nooddienste vanoor die Suid-Kaap uitreik na die St Johns Kleuterskool in Highway Park, waar na talle kleuters onder haglike omstandighede omgesien word.
Die Mosselbaai sameroeper van die gemeenskapsuitreikaksie, Nadia Jacobus-Julies (078 788 4112) sê die brandbestryders gaan onder meer die hek na die perseel vervang, die erf ‘n bietjie opknap, en algemene onderhoudswerk aan die perseel doen.
“Dis hartroerend om te sien dat die kleuters daar op matrasse slaap wat van die vullishoop gered is, om daarop te let dat die enigste toilet buite werking is, en dat die speelarea besaai van duwweltjies is. Die kleuters het geen speelgoed nie, daar is ‘n algehele behoefte aan basiese benodigdhede.
"Enige Mosselbaaier wat graag speelgoed, warm komberse, eetgoed, selfs eetgerei wil skenk, is welkom om dit by die brandweerstasie af te gee, of my te skakel sodat gereel kan word dat dit afgehaal kan word.”
Die groep gaan môre die ganse oggend spandeer om die lewe van die kleuters op te kikker en ‘n vroliker omgewing te skep waar hulle bedags versorg kan word.
'Ons bring jou die nuutste Mosselbaai, Tuinroete nuus'
