MOSSELBAAI NUUS - Die bosluisvoëlprobleem in Hartenbos gaan daadwerklik deur die Mosselbaai Munisipaliteit aangespreek word. Die voëls, ook bekend as vee-reiers, het veral in die laaste twee tot drie jaar 'n oorlas geword vir beide inwoners en vakansiegangers.
Die Raad het tydens 'n spesiale raadsvergadering op Maandag, 25 Januarie, voorstelle aanvaar dat skoonmaakspanne die betrokke areas daagliks en tot einde April sal skoonmaak, saagsels onder die bome waarin die voëls nesmaak sal gooi, en dat massa-vullishouers op strategiese punte geplaas sal word. 'n Diensverskaffer sal ook aangestel word om die kuikens wat uit die neste geskop word, te hanteer en om die geaffekteerde areas te ontsmet.
'n Langtermyn-strategie word vervolgens in oorleg met bewaringsinstansies soos CapeNature en die Eden Distriksmunisipaliteit, wat vir omgewingsgesondheid verantwoordelik is, ontwikkel, wat onder meer beplanning vir 'n alternatiewe habitat by geskikte waterbronne in Hartenbos, en die aanwending van natuurlike vyande soos roofvoëls, sal insluit.
Probleme word ervaar met die voëls wat in groot getalle in bome in Hartenbos nesmaak en broei. Van die grootste kwelpunte is die besoedeling onder die bome waar hope mis, vere, dooie kuikens en selfs slange wat as kos vir die kuikens deur die volwasse voëls aangedra word, aangetref word. Boonop veroorsaak die samestelling en gekonsentreerde aard van die mis, benewens 'n skerp en onwelriekende stank, dat die bome waarin neste voorkom, vernietig word.
Die bosluisvoëls se voeding bestaan uit sprinkane, wurms, erdwurms en ander insekte, spinnekoppe, skerpioene, paddas, akkedisse, klein voëltjies in neste, selfs bosluise. Tot 83% van die dieet kan egter uit vis bestaan. Die habitat rondom die nabygeleë streeksrioolaanleg en Hartenbosriviermonding, waarin 17 visspesies voorkom, is dus 'n ideale teelplek vir die voëls wat in die Wes-Kaap 'n bedreigde spesie is en deur wetgewing beskerm en gereguleer word.
Om ’n boom waarin die voëls neste met eiers of kuikens het af te saag, word ingevolge bewaringswetgewing as jag beskou en is ’n oortreding wanneer dit sonder ’n permit gedoen word. Oortreders kan boetes, tronkstraf of beide opgelê word.
Die munisipaliteit kan die voëls gevolglik nie goedsmoeds verwyder nie, en veral nie tydens die lang broeiseisoen wat vanaf September tot einde April duur nie. Die bosluisvoëlprobleem sal dus by uitstek in die winter aangespreek moet word.
Die grootste broeikolonie kom nou sowat 500 meter van die Hartenbosrivier en in sowat nege bome digby woonhuise voor. Sommige bewese afskrikmiddels, soos die gebruik van klank-kanonne of vuurwerke, kan gegewe bestaande munisipale verordeninge oor geraassteurnis en vuurwerke nie aangewend word nie. Daarbenewens sal dit vir die inwoners eweneens onaanvaarbaar wees.
Uit oorlegpleging met Birdlife SA, die Suid-Afrikaanse Ornitologiese Vereniging, blyk dit dat die verwydering van die bome waarin die voëls se neste voorkom die enigste oplossing mag wees, maar dit is nie 'n wenslike opsie nie weens die nuts- en estetiese waarde van bome en die tyd wat dit verg om bome te hervestig.
Dit blyk egter dat die bosluisvoëls hoofsaaklik in gewone dennebome nesmaak, en deel van die langtermynbeplanning is dus dat hierdie bome ingevolge die Raad se Boom Beleid hanteer en verwyder sal moet word.
Landbouers in Suid-Afrika beskou die bosluisvoël as so nuttig dat hulle die voëls op hulle plase gevestig het om insekte wat gewasse beskadig, te beheer. Elke voël kan meer as 600 sprinkane en krieke, selfs vlieë en ander insekte per dag verorber.
Foto's: www.ispotnature.org
ARTIKEL: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
