MOSSELBAAI NUUS - Bejaardes wat staatmakers in hul gemeenskap is en steeds elke dag 'n verskil maak, kan nou inskryf om as die Silwerkroon-wenner van 2015 gekroon te word.
Inskrywings vir Solidariteit Helpende Hand se Silwerkroon-toekenning 2015 is nou oop en enige persoon bo die ouderdom van 60 kan genomineer word of self vir hierdie gesogte toekenning inskryf.
Ewald Crause (70) van Hartenbos was een van die 10 finaliste vir die 2014 Silwerkroon-toekenning.
Ewald, meer bekend as Seevader onder die Hartenbos-gemeenskap, bied al sedert die 1970's 'n avontuurskool vir seuns tussen 16 en 20 jaar aan. Verskeie groepe en orga-nisasies maak gebruik van die diens wat hy lewer om jong seuns, waaronder talle straatkinders en minderbevoorregte jongmense, bloot te stel aan omgewingsopleiding en só te help met hul karaktervorming.
"Ewald reik op 'n baie unieke manier uit na die behoeftige kinders in sy gemeenskap," sê René du Preez, projekorganiseerder van Helpende Hand se Ouma-en-oupa-projekte.
"Mense kom van regoor die land om in Hartenbos vakansie te hou en hulle gaan dan saam met hom op natuuruitstappies waar hulle meer oor die see en seelewe kan leer.
"Hy is ook betrokke by kursusse vir skoolleiers en kerkjeugleiers en bied motiveringspraatjies vir matrieks aan. Die belangrikste aspek van sy kursusse en avontuurskool is dat mense deur die natuur nader aan God kom," sê sy.
Persone wat vir die Silwerkroon-toekenning oorweeg word, is mense wat onbaatsugtige dade in enige vorm in die gemeenskap doen.
Dit kan iemand wees wat betrokke is by formele liefdadigheidsaksies, bystand aan iemand in nood verleen of selfs net 'n kameraad vir die gemeenskap se eensames is.
Inskrywingvorms kan op Silwerkroon se webwerf afgelaai word by www.silwerkroon.co.za of kontak Helpende Hand by 012 644 4390 indien 'n inskrywingvorm gepos of gefaks moet word. Die sluitingsdatum vir inskrywings is 31 Mei.
Klik hier vir verwante artikels:
- Besonderse bejaardes kry erkenning
- Bejaardes slagoffers van kaartbedrog
- Senior burgers geniet Burgemeesterstee
'Ons bring jou die nuutste Mosselbaai, Tuinroete nuus'
