MOSSELBAAI NUUS - Vakansiegangers en Mosselbaaiers wat gereeld oor Desember die stalletjies op Hartenbos vir daardie unieke geskenkies besoek, kan gerus wees dat hulle vanjaar steeds rondom die Walvissaal sal uitstal.
Die stalletjies wat deur die Mosselbaai Munisipaliteit in Kaap de Goedehooplaan geplaas word, staan onder beheer van die Onafhanklike Entrepreneurs Verenging.
Ekstra stalletjies word boonop beplan voor die ATKV se Carney gebou vir 2015. Die ATKV-Hartenbos en hul ontwikkelingsvennoot het 'n aanvang geneem met die herontwikkeling van die strandoord.
Met 'n trotse geskiedenis van 79 jaar trek die ATKV-Hartenbos 'n nuwe baadjie aan nadat die oranisasie vandeesweek toestemming gekry het om voort te gaan met hul planne vir die ontwikkeling van die Hartenbos Seefront.
Na verskeie gesprekke en voorleggings, het die Raad van die Mosselbaai Munisipaliteit die goedkeuring aan die ATKV verleen om voort te gaan met die projek.
Volgens Japie Gouws, besturende direkteur van die ATKV-groep gaan die eerste fase van die ontwikkeling in Julie 2015 begin en sê Gouws dat die ontwikkeling nie net 'n aanwins vir die ATKV en sy lede sal wees nie, maar ook vir Mosselbaai en die Suid-Kaapse toerismebedryf.
Die ontwikkeling sal in vier fases hanteer word waarvan die eerste fase teen November afgehandel sal wees om te verseker dat vakansiegangers oor die feesseisoen hul vakansie op Hartenbos kan geniet. Die eerste fase van die ontwikkeling behels:
Die Skoffelskuur en Na Donker-kuierplek en restaurant verskuif na langs die Walvissaal.
Die konstruksie van die ablusieblok op die B-kampeerterrein.
Die warmwater-onderdakswembad word opgegradeer en uitgebrei.
Die konstruksie van die eerste gedeelte van die kleinhandelfasiliteite en nuwe pretpark begin.
Verskeie pad-opgraderings word rondom die terrein voltooi.
Belangstelling onder kleinhandelaars vir vloerspasie in die ontwikkeling is baie groot en onderhandelinge begin nou in alle erns om vir gaste, kopers en die gemeenskap waarde en verskeidenheid te bied.
Desember 2015
Hoewel die Pretpark slegs gedeeltelik toeganklik sal wees (wipmatte, minigholf en kouewaterswembad) sal daar heelwat alternatiewe vermaak vir jonk en oud aangebied word by die Amfiteater.
Weens konstruksie en die voldoening aan veiligheidsmaatreëls sal sekere parkeerareas nie beskikbaar wees tydens Desember 2015 nie, maar voorsiening vir addisionele parkering sal gemaak word.
Ter wille van veiligheid sal ongeveer 25 staanplekke op die B-kampeerterrein gedurende konstruksie, sowel as oor Desember 2015 nie beskikbaar wees nie.
Die Hartenbos Seefront se tweede fase skop vroeg in 2016 af vir voltooiing teen Desember 2016, wat insluit die omskepping van die Walvissaal in 'n meerdoelige sentrum wat onder andere ? ysskaatsbaan gedurende die vakansieseisoene sal insluit, konstruksie van verdere kleinhandelwinkels en restaurante asook n splinternuwe water- en pretpark.
Fase drie van die ontwikkeling behels die opgradering van die bestaande strandoordsentrum en fase vier sluit nuwe luukse vakansiebehuising in.
Die tweede fase van die ontwikkeling skop vroeg in 2016 af en sal teen Desember volgende jaar voltooi wees.
Beplan sommer nou reeds om die interessante gaskunstenaars wat op uitnodiging van die ATKV op Hartenbos oor Desember sal optree, te ondersteun:
15 Desember: Konsert met Daniele Pascal en Jannie Moolman
17 Desember: Suid-KaapWynproe
18 Desember: Die Kaap is weer Holmsdeur Marion Holms
19 Desember: Die klaagliedere van ds.Tienie Benade deur Frank Opperman
21 Desember: Lollos
21 Desember Bok & Biltong aangebied deur Manne van die Woord;
22 Desember: Lollos
Die ATKV het ook heelwat moeite gedoen om net die beste Suid-Afrikaanse kunstenaars na optredes by die amfiteater te lok:
22 Desember: Konsert met Andriette Norman, Pieter Koen en Steve Hofmeyr
24 Desember: Kersliedere by Kerslig met Die Broers
26 Desember: Mej.Hartenbos met Donnalee Roberts en Ivan Botha
26 Desember: Konsert met Dillon Lerm, Robbie Wessels en Karlien van Jaarsveld
30 Desember: Konsert met EDEN en Bobby van Jaarsveld
31 Desember:Oujaarsdans met Die Broers
4 Januarie: Konsert met Ray Dillan en Snotkop
Die ATKV hoop dat die eerste fase van die herontwikkeling van die ATKV-Hartenbos Strandontwikkeling teen November vanjaar afgehandel sal wees. Foto's: Dave van der Merwe
Klik hier vir vorige artikels:
- Laaste seisoen vir Hartenbos Waterwurm
- Waterpark beslis deel van ATKV-plan
- Waterwurm slagoffer van ATKV-ontwikkeling
ARTIKEL: NICKEY LE ROUX, MOSSEL BAY ADVERTISER JOERNALIS
'Ons bring jou die nuutste Mosselbaai, Tuinroete nuus'
