MOSSELBAAI SAKE NUUS - ‘n Splinternuwe konsep vir gesinsvermaak in die vorm van ‘n mobiele filmteater, is onlangs deur die Liebenberg-gesin na Mosselbaai gebring.
Dit is slegs een van vyf in Suid-Afrika en beloof om baie vinnig uiters gewild te raak. Met die koms van Tela Grande na Mosselbaai, kan gesinne soos in die goeie ou inrydae, weer ‘n piekniekmandjie pak en in die buitelug onder die sterrehemel, na ‘n film gaan kyk.
Die PVC-skerm se projeksiewydte is 9 meter wyd en 5 meter hoog met ‘n totale grootte van 12 meter by 9,4 meter. ‘n Uitstekende klankstelsel sorg vir kristalhelderklank, om die groot skerm fliekervaring indrukwekkend te maak.
Die konstruksie kan ‘n mate van wind hanteer maar uit die aard van die saak, sal die natuurelemente die finale sê oor aanbiedinge hê. Verskeie films vorm deel van die Liebenbergs se “biblioteek” en selfs dokumentêre films kan tydens spesiale funksies en vertonings versoek word.
Tela Grande is die afgelope naweek tydens Hartenbos Laerskool se jaarlikse Beesloop vir die eerste keer aan inwoners bekendgestel en ‘n heerlike fliekatmosfeer met gesinne op komberse en kampstoele wat springmielies eet en fliek kyk, is geskep.
Tela Grande is ook beskikbaar vir verhuring aan persone en instansies vir buiteluggeleenthede en -feeste. Die onderste gedeelte van die skerm beskik oor advertensiespasie vir besighede en adverteerders kan promosiemateriaal op die skerm laat draai voor die film vertoon word – ‘n unieke bemarkingsgeleentheid.
Vir meer inligting rakende vertonings kan Christian Liebenberg geskakel word by 084 448 8832. Of besoek die Tela Grande facebook blad by facebook.com/cinematela .
'Ons bring jou die nuutste Mosselbaai, Tuinroete nuus'
