SUID-KAAP LANDBOUNUUS - Meer as 350 diere kom op 2 April op Lasarus Wildplaas in die Albertinia-distrik onder die hamer.
Tydens die tweede produksieveiling van Nico, Sonette en Hertie Lerm word wild van gehalte van Lasarus Wildplaas en 777 Game Breeders (Albertinia) en die Lerms se ander plase in die Karoo, Limpopo en Vrystaat aangebied.
Altesaam 150 diere is vooraf in die bomas te besigtig, terwyl sowat 200 per katalogus aangebied word. “Die meeste van hierdie wild kom van ons plaas in die Albertinia/Mosselbaai distrik waar strawwe hartwater en rooiwater voorkom, asook van ons ander plase in die Karoo, Limpopo en die Vrystaat,” sê Sonette Lerm.
Onder die topdiere is die njalabul Zoro, die Livingstone-elandbul Mahati en die goue wildebees Salomo. Hoewel hierdie drie nie te koop aangebied word nie, maar slegs diere wat saam met hulle loop en of dragtig is van hulle, en hul kinders. Hulle kan wel in al hul glorie besigtig word.
Ander spesiale wild wat aangebied word sluit in: Buffelkoeie met kalwers, waterbuffels, Swartwitpensbulle (Matetsi en Wes-Zambiese) en -verse, swart-, wit-, koper- en room springbokke uit hartwaterveld, koedoekoeie wat saam met bulle met horings van tussen 53” en 60” loop, ‘n goue gemsbokbul, ’n swartrooibokram, vaalribokke en bontebokke.
Gewone wild wat aangebied word is waterbokke, rooihartbeeste, gemsbokke, koedoes, rooibokke, springbokke, blesbokke, bontebokke, handmak springbokke, ‘n handmak duikertjie, bosbokke en sebras.
“Die meeste van die wild kom uit gebiede waar hartwater en rooiwater voorkom, eet wildspille en is geteel om in alle omstandighede aan te pas,” sê Sonette.
Daar is ook ‘n wit poumannetjie met gewone pouwyfies en volstruise op veiling.
Goeie pryse kan verwag word. “Daar is baie navrae van die groot manne in die bedryf, maar gewoonlik wil hulle nie hê hul name moet vooraf bekend gemaak word nie,” sê Sonette.
Dit sal BKB Wildlife se eerste wildsveiling wees. Len Bornman is die afslaer, en Hertie (13), die jongste gekwalifiseerde afslaer in die land en Namibië, gaan ook ‘n paar lotte opveil.
Die veiling begin stiptelik om 12:00. ‘n Kontantkroeg is beskikbaar en eetgoed sal te koop aangebied word.
Voornemende kopers kan Nico by 082 448 3975 of Sonette by 082 443 1147 skakel of stuur ‘n e-pos nalasarusgamefarm@gmail.com
Die nageslag of koeie wat saam met die bul loop sal tydens die veiling onder die hamer kom. Foto's: Verskaf
Meer as 350 diere kom op 2 April op Lasarus Wildplaas in die Albertinia-distrik onder die hamer.
ARTIKEL: TISHA STEYN
'Ons bring jou die nuutste Klein Karoo, Hessequa, Tuinroete nuus'
