MOSSELBAAI NUUS - Die Mossel Bay Advertiser het die afgelope paar weke in die aanloop tot die jaarlikse Diasfees verskeie vrae en besware van lesers oor die fees ontvang.
Die klagtes het oorwegend gesentreer op die naam en programformaat van die fees, die beweerde ontoeganklikheid van die fees vir plaaslike kunstenaars, en die toekenning van uitstalruimte vir stalletjies op die feesterrein.
Die munisipale woordvoerder, mnr Harry Hill, het hierop reageer:
Hill wys daarop dat die naam van die fees gekoppel is aan die landing van Bartolomeu Dias. Hierdie mees geskiedkundige ontmoeting van kulture in Suid-Afrika se geskiedenis het in Mosselbaai plaasgevind. Die feestema is immers "Waar kulture ontmoet".
Die munisipaliteit is bewus van individue wat nie met die fees se naam saamstem nie, maar het nog geen grondige of amptelike besware ontvang wat dui op 'n wyer ontevredenheid nie.
Die duisende jaarlikse feesgangers het oënskynlik nie 'n probleem met die naam Diasfees nie. 'n Naam kan nie verander word omdat 'n klein groepie mense op sosiale media daaroor kla nie.
Die program toon dat 10 plaaslike sangers teenoor 23 nasionale kunstenaars by die fees sal optree, terwyl ses plaaslike kletsrymgroepe (rappers) ook optree by 'n spesiale item op die program op Saterdag, 4 Februarie. Dit is 'n eerste.
Die spesiale Mokka-produksie betrek juis plaaslike kunstenaars, terwyl altesame nege plaaslike koperblaasorkeste aan die fees sal deelneem. Dit is egter 'n feit dat die teenwoordigheid van nasionale kunstenaars die fees se grootste trekpleisters is. Plaaslike kunstenaars word aangemoedig om hul dienste vir toekomstige feeste te kom aanbied.
Daar kan nie saamgestem word met die stelling dat die feesprogram of -formaat saai is nie. Die insluiting van rappers, die Mokka-produksie, die laservertoning vanjaar pleks van 'n vuurwerkvertoning en die groter klem op klassieke musiek is alles vernuwings, hoewel die formaat oor die laaste paar jaar baie suksesvol blyk te wees.
Die oorgrote meerderheid nasionale kunstenaars is ook nuwe gesigte. Geen ander fees in die land bied die geleentheid aan die publiek om gratis toegang tot hierdie konserte te kry nie, en sodoende nasionale kunstenaars te sien optree waarvoor hulle normaalweg aansienlike toegangsfooie moet betaal nie.
Toekenning van stalletjies
Daar is reeds 110 bevestigde stalletjies wat op die feesterrein
gaan uitstal. Die toekening van
die stalletjies word deur die munisi-paliteit, en nie die Onafhanklike Entrepreneursvereniging nie, gedoen. Die OEV lewer geen insette nie, en is bloot behulpsaam met die logistieke reëlings tydens die fees.
Faktore wat in ag geneem word by die toekenning van die stalletjies is die uitlegplan, spasie wat deur die stalletjie opgeneem sal word, spesifieke behoeftes soos water- en elektrisiteitsaansluitings, toeganklikheid vir toerusting, stalletjies wat nie onder bome inpas nie omdat hulle te hoog is, en dies meer.
Dit is jammer dat persone wat waardevolle insette kan gee, nie direk met die munisipaliteit skakel nie. Die nuwe munisipale bestuurder, adv Thys Giliomee. het reeds 'n uitnodiging aan belangstellendes gerig om hulle gewig in te gooi by die munisipaliteit en betrokke te raak by sake soos die reël van die jaarlikse Diasfees.
Gedurende verlede jaar se Diasfees.
ARTIKEL: NICKEY LE ROUX, MOSSEL BAY ADVERTISER-NUUSREDAKTEUR
'Ons bring jou die nuutste Mosselbaai, Tuinroete nuus'
