MOSSELBAAI NUUS - Die ATKV se jaarlikse Buitelugfees het die afgelope naweek by die Amfiteater in Hartenbos plaasgevind.
Die fees is Vrydagmiddag amptelik deur Mosselbaai se Burgemeester, Raadsdame Marie Ferreira, geopen waar sy terselfdertyd die Sportfees se Touchies-toernooi ook bygewoon het.
Die fees het genoeg vermaak vir die hele gesin gebied. Kyknet se eerste Koekedoor wenner, Mareli Visser het kook demonstrasies in die vlooimarktent aangebied en André de Villiers van Safari 4 x 4 het die plaaslike 4 x 4 geesdriftiges op die ATKV se terrein 'n paar dinge wysgemaak.
Verskeie motorhandelaars het uitstallings aangebied en daar was ook uitstallers van 4 x 4-benodigdhede. In die vlooimarktent was verskeie stalletjies met interessante items wat te koop aangebied is.
Vir die hongeres was daar vetkoeke, pannekoek, hamburgers en al die lekker eetgoed wat by 'n fees beskikbaar is. Crossfit het verskeie oefentegnieke gedemonstreer.
Dillon Lerm was die seremoniemeester tydens die naweek se aktiwiteite en hy, Joe F en Gerrie Pretorius het Saterdagaand na die rugby in die biertent opgetree. Vir die kinders was daar ook hope vermaak soos springkastele, skyfskiet en abseil.
Een van die hoogtepunte van die fees was die Ratelman-kompetisie wat Saterdagoggend plaasgevind het.
Die uitmergelende kompetisie het afgeskop met 'n 1,5km swem in die Hartenbosrivier gevolg deur 37km fietsry in die omgewing en geëindig met 10km hardloop.
Die fees is Sondag paslik afgesluit met 'n ere-diens deur Manne van die Woord se Dawie Spies.
Die wegspring van die Ratelman-kompetisie.
Die bekwame pannekoekspan saam met Koekedoor-wenner Marli Visser (links agter).
Klik hier vir vorige artikels:
- Hartenbos Buitelugfees die naweek
- Ratelman Uitdaging tydens Buitelugfees
- ATKV se Buitelugfees gaan groot
FOTO'S: TERSIA MARAIS
'Ons bring jou die nuutste Mosselbaai, Tuinroete nuus'
