MOSSELBAAI NUUS - ’n Mosselbaaier wat die afgelope drie jaar in Amerika werk, is ernstig in ’n fratsongeluk op ’n plaas in Nebraska beseer.
Hugo Pretorius was verlede week Dinsdag, 21 Julie, besig om ’n pomp van ’n spilpuntbesproeiingstelsel aan te sit toe die dryfas in die middel gebreek het.
Die gebreekte deel van die dryfas, asook die beskermingsplaat, het Hugo aan sy arm en onderlyf getref en ernstige skade aangerig.
Sy vrou, Elani, eienaar van Ace Models in Mosselbaai, het aan die Mossel Bay Advertiser gesê die impak het Pretorius se voete onder hom uitgeslaan.
“Hy het sy bewussyn verloor en ons weet nie hoe lank dit was voordat hy wakker geword het nie. Hy het baie bloed verloor. Sy selfoon het eenkant gelê en wonderbaarlik kon hy sy foon kry.”
Dit was die eerste van vele wonderwerke, sê Elani.
Elani sê haar man kon daarin slaag om ’n vriend van hom, Ebert van Vuuren, wat ook in Amerika werk, in die hande te kry.
Hoewel hul werkplekke ver van mekaar geleë is, was Van Vuuren op daardie dag slegs sowat twee minute se ry van Hugo af.
Sy sê haar man glo dit is slegs deur die Here se genade dat alles so presies verloop het.
“Ebert het noodhulpopleiding en het Hugo se lewe gered. Hy het 911 gebel en by Hugo in die veld gesit en bid, terwyl hy sy hartklop op sy horlosie dopgehou het.”
Pretorius is per lugambulans na ’n hospitaal in Kearney, die naaste stad in die omgewing, geneem.
Van Vuuren het vir Elani gebel en gedeel dat Hugo in ’n massiewe ongeluk was, ernstige skade opgedoen het en per helikopter na die hospitaal geneem is.
Daarna was Hugo vir 13 ure in die teater, waar niemand enige inligting gehad het nie.
“Die onsekerheid was uitmergelend.”
Van Vuuren het nie die hospitaal verlaat voordat hy nie genoeg inligting gehad het om Elani op hoogte te bring nie. “Ons is hom ewig dankbaar vir sy rol in hierdie gebeurtenis. Hy het my man gered.”
Sy sê dokters kon Pretorius se hoofslagaar heg, wat veroorsaak het dat hulle sy bene kon red.
Volgens Elani sien hul familie die Here se hand in alles.
“Daar is geen toeval nie, dis wonderbaarlik hoe God hierdie in plek gesit het. Enige klein verandering sou sy lewe gekos het.”
Die Pretoriusse kry groot steun van inwoners van Nebraska.
Elani sê die gemeenskap staan hulle by en boonop praat die suster wat in die intensiewesorgeenheid werk, slegs bekend as Kechanne, ook Afrikaans.
“Die wyse waarop hulle hom in die hospitaal met geduld en sorg hanteer, is gerusstellend. Ons is dankbaar vir hulle menswees.”
Hugo Pretorius. Foto: Verskaf
Pretorius is steeds in die intensiewesorgeenheid en is Vrydag, 24 Julie, van die ventilator afgehaal.
Die fokus is volgens Elani steeds om sy bene te herstel.
Sy volgende operasie is geskeduleer vir Woensdag, 29 Julie. Elani sê daar lê egter nog ’n lang herstelpad vir hom voor. “Met die steun van die Nebraska-gemeenskap en mense soos Wilmari Naude, gaan ek en ons twee seuntjies volgende week na Hugo toe.”
Die Pretoriusse, Hugo, Elani, Jax en Kai. Foto: Verskaf
Sy bedank ook almal wat intussen na hulle uitgereik het, gebid het en vir die gesin ingetree het wanneer sy sê hulle self gesukkel het om staande te bly. Kiki Smith, ’n Mosselbaaier en vriendin, help Elani met alle reëlings van die kant af.
Die egpaar se kinders, Jax en Kai, is in Laerskool Hartenbos en is onderskeidelik agt en tien jaar oud.
“Ek kan nie wag om alles vir my man te vertel nie, want hy het so ’n mooi fondasie vir ons seuns gelê.”
Sy sê sy weet nog nie hoe lank sy en die seuns in Amerika gaan wees nie, omdat Pretorius se herstelpad nog onseker is.
“Ek het glad nie ’n idee van die toekoms nie. Ek weet net die Here gaan my nie nou los nie,” sê Elani.
Intussen is ’n ondersteuningsfonds op GoFundMe vir Hugo gestig. Die fonds se naam is: Help Hugo Fight for Tomorrow. Besoek die platform vir meer inligting.
‘Ons bring jou die nuutste Tuinroete, Hessequa, Karoo nuus’
