MOSSELBAAI NUUS - Reaksie op 'n programinsetsel wat op 25 Januarie vanjaar op die gewilde nuusprogram Carte Blanche uitgesaai is rakende die beskikbaarheid van 'n dwelmmiddel wat na bewering by laerskole in snoepwinkels verkoop is, het ook hier in Mosselbaai opgevlam.
Strawberry Quick, soos die dwelmmiddel genoem word, ook algemeen bekend as die gevreesde metamfetamien of Tik, is volgens die programinsetsel na bewering as suikerstrooitjies by laerskole in Gauteng versprei.
Metamfetamien of Tik is hoogs verslawend. Chroniese misbruik van metamfetamien, wat as fyn poeier of as kristalle in strooitjies verkoop word, verander die manier waarop die brein funksioneer.
Dit word meermale as 'n mengsel verkoop, wat dan byvoorbeeld glukose, bakpoeier, lyfpoeier, hoofpynpoeier, of die bitter koorsweermiddel, kinien, bevat.
Ander byvoegings sluit dikwels ook giftige stowwe in soos batterysuur, swembadsuur of lampolie, wat die fisieke gevolge van verslawing vererger.
'n Gemeenskapskoerant in Pretoria, die Pretoria Noord Rekord berig in 'n opvolgartikel op 30 Januarie dat ADA-SA (Anti Drug Alliance SA) die bestaan en verspreiding van die dwelmmiddel onder laerskoolkinders in die groter Johannesburg bevestig. In die artikel sê ADA-SA ook dat die dwelmmiddel, verpak in suikerstrooitjies, in verskillende geure beskikbaar is en dat selfs pakkies sherbet met kokaïene ook onder die gewraakte middels is wat versprei is.
Voorbeelde van die suikerstrooitjies wat getoets is, dui daarop dat dit tot 30% metamfetamien bevat, gemeng met voedselkleursel, geursel en suiker.
Volgens Kapt Tekkie van Rensburg, speurhoof van die Mosselbaai-polisie in Georgeweg en dwelmkenner, het hierdie tendens nog nie kop uitgesteek in Mosselbaai en omgewing nie.
"Ons het 'n betroubare bronnenetwerk en het tot dusver nog nie enige inligting rakende die teenwoordigheid van die sogenaamde Strawberry Quick in laerskole in ons omge-wing ontvang nie."
'n Lid van die Langeberg K 9 honde-eenheid, het by navraag bevestig dat lede van dié eenheid in Maart vanjaar juis opleiding ontvang rakende die nuwe tendense in dwelmhandel.
Mnr Daan du Toit, hoof van Laerskool Park, het gesê dat dié skool se snoepwinkel privaat bedryf word, maar dat die kontrak jaarliks toegeken word op goedkeuring van 'n voorlegging wat gemaak word.
"Ons is baie gesteld op wat by die Snoepie beskikbaar is, ter wille van ons kinders se gesondheid."
Mnr Van Wyk Dames, skoolhoof van Milkwood Primary, lewer soortgelyke kommentaar op navrae. Ook hier word die snoepwinkel al etlike jare deur dieselfde privaat persoon bedryf.
Volgens hom, is die skool reeds die afgelope drie jaar bewus van gerugte rakende die bestaan en verspreiding van sogenaamde Strawberry Quick.
"Ons het al verskeie berigte en waarskuwings gekry van besorgde ouers via e-pos en fotostate van koerantartikels wat elders gepubliseer is."
Volgens Dames is 'n bepaalde onderwyser aangewys om 'n ogie oor die snoepwinkel te hou en aan die bestuur te rapporteer indien enige ongewenste of verdagte artikels verkoop word.
"Kinders mag ook glad nie enigiets op die perseel verkoop nie."
Mnr Granville Briesies van Diaz Primêre Skool meen dat alhoewel daar op sy skoolterrein sorg geneem word met wat by die snoepwinkel verkoop word, die gevaar dikwels lê by wat rondom die skoolterrein by onder andere informele winkels verkoop word.
"Die onderwysers by ons skool bedryf self die Snoepie sodat ons ten volle beheer daaroor kan hê."
Soortgelyke scenarios is in plek by Erika en ook St Blaize Primêre Skole.
"Ons bedryf die Snoepie self en op 'n baie klein skaal," meen mnr Michael Kleynhans van Erika Primêr.
Hier word byvoorbeeld geen koeldrank nie, maar slegs enkele lekkergoed en skyfies verkoop.
"Die skool koop self die voorrade vir die Snoepie aan en dit word bedryf deur 'n lid van ons Beheerraad," verduidelik mnr André Muller van St Blaize RK Primêr.
Enige navrae of inligting kan verwys word na die SAPD se dienskantore by die volgende kontaknommers:
- Mosselbaai: 044 606 2805
- Da Gamaskop: 044 606 2202
- Groot-Brakrivier: 044 620 2495
- KwaNonqaba: 044 606 5617
'Ons bring jou die nuutste Mosselbaai, Tuinroete nuus'
