MOSSELBAAI NUUS - Ondanks die munisipale verordening wat die afvuur van vuurwerke en Chinese lanterns in die ganse Mosselbaai-area verbied, verkoop sekere plaaslike winkels steeds die produkte.
"Ongelukkig kan die munisipaliteit nie ‘n verbod op die verkoop van vuurwerke plaas nie, aangesien dit deur nasionale wetgewing gereguleer word, en lisensies vir die verkoop daarvan deur die SA Polisiediens uitgereik word," sê Mosselbaai Munisipaliteit se munisipale bestuurder, dr Michele Gratz.
Sy sê daar is tans vier winkels in Mosselbaai wat lisensies het om vuurwerke te verkoop, en dit steeds doen ongeag die munisipale verbod op die afvuur van die vuurwerke in die groter Mosselbaai gebied.
“Dit is jammer dat winkeleienaars nie hul weg oopsien om die probleem te help hokslaan nie, en steeds voortgaan om vuurwerke te verkoop, ondanks die verbod op die afvuur van vuurwerke in Mosselbaai se munisipale area.
“Dit blyk gelukkig dat die Wet op Plofstowwe tans onder hersiening is en baie strenger gemaak gaan word. Hopelik sal dit in die toekoms tot ‘n verbetering in die situasie lei. Ons doen nietemin intussen ‘n beroep op almal se samewerking, veral dié van besighede wat vuurwerke verkoop,” het sy bygevoeg.
Hoewel vakansiegangers en inwoners in die algemeen in die meeste opsigte oor die feesseisoen goed saamgewerk het, was dit nie die geval met vuurwerke nie en is daar, ondanks die munisipale verbod, steeds orals vuurwerke afgevuur en Chinese lanterns gelanseer.
“Dit is ongelukkig baie moeilik om die afvuur van vuurwerke te polisieer weens die uitgestrekte kuslyn van Mosselbaai. Munisipale wetstoepassingsbeamptes het gewoonlik hul hande ekstra vol met onder meer verkeersbeheer op Oujaarsaande, en dit is jammer dat, pleks van saam te werk, daar steeds mense is wat die verbod eenvoudig ignoreer.
“Daar is goeie redes hoekom die verbod bestaan, onder meer oor die brandgevaar wat dit skep, mense se veiligheid en ook die nadelige invloed wat dit op troeteldiere, veral honde, het."
Volgens die Mosselbaai tak van die Garden Route DBV, is 15 verlore honde na Nuwejaarsdag by hul fasiliteit op Bill Jefferyrylaan hanteer. Die honde het waarskynlik weens 'n vrees vir vuurwerke op straat beland. 'n Verdere 12 honde is by die DBV as vermis aangemeld en is teen druktyd steeds nie opgespoor nie.
"Die Mosselbaai DBV wil dankie sê aan diegene wat nie vuurwerke geskiet het nie," sê die Mosselbaai DBV bestuurder, Elmarie Veldsman.
Ingevolge die Munisipale Verordening insake die Beheer van Vuurwerke mag vuurwerke nie binne die Mosselbaaise munisipale gebied afgevuur word nie, tensy die skriftelike toestemming van die munisipaliteit ten minste 14 dae voor die tyd verkry is, en dan ook net ten opsigte van ‘n gebied wat vir die doel goedgekeur is. Die aansoeker moet onder meer bewys lewer van voldoende openbare aanspreeklikheidsversekering.
Die lansering van Chinese lanterns is totaal verbode ingevolge die Verordening insake Gemeenskapsbrandveiligheid.
Die motivering vir hierdie verordening is, volgens die munisipale bestuurder, eenvoudig op openbare veiligheid geskoei.
"Chinese lanterns het in die verlede al op tente te lande gekom en brande veroorsaak, en dit kan maklik as noodfakkel oor die see verwar word, wat onnodige en duur reddingspogings tot gevolg het.
"Daar is geen geoormerkte area in die Mosselbaai munisipale area waar vuurwerke wettig afgevuur mag word nie. In die verlede het die Diaz Hotel wel toestemming gehad om vuurwerkvertonings aan te bied, maar dit is nie meer die geval nie," aldus dr Gratz.
In Stilbaai het die 15-jarige Miyanke Ferreira tweede- en derdegraadse brandwonde opgedoen nadat 'n vuurwerk haar direk getref het.
Sy was deel van 'n groot groep mense wat op die Stilbaai Hawe na vuurwerke gekyk het toe iemand sowat 15 meter van haar af 'n vuurwerk aangesteek het. Die vuurwerk het egter vir Miyanke getref en gate deur 'n kombers en haar klere gebrand. Sy is in Mosselbaai vir brandwonde behandel.
ARTIKEL: NICKEY LE ROUX, MOSSEL BAY ADVERTISER-JOERNALIS
'Ons bring jou die nuutste Mosselbaai, Tuinroete nuus'
