MOSSELBAAI NUUS - Die Da Gamaskop-polisie maan die publiek om bedag te wees op verskaffers wat met 'n slenterslag geld uit hulle niksvermoedende kliënte maak, deur bedrieglike Wendyhuis-advertensies.
Volgens kapt Wollie Fourie, kommunikasiebeampte van die polisiestasie, is daar onlangs weer gevalle aangemeld waarby 'n sogenaamde 'Lawrence' Wendyhuise teen 'n sekere bedrag in koerante adverteer.
Voornemende kliënte word glo by navraag rakende die advertensie, versoek om geld in 'n bepaalde rekening of by Shoprite Geldmark in te betaal waarna die Wendyhuis dan aan hulle sal gelewer word.
"Ons het 'n verdagte en 'n medepligtige in hierdie verband tot in Worcester gevolg, waarna die spoor doodgeloop het," sê kapt Fourie. "Omdat hierdie Wendyhuise, baie bekostigbare behuising bied, word slagoffers maklik in die verband uitgebuit."
Kapt Fourie maan voornemende kopers om die volgende in gedagte te hou voor hulle enige fondse in 'n vermeende swendelaar se rekening inbetaal:
- Versoek om die adverteerder by 'n fisieke adres te ontmoet.
- Vra om die goedere of persele waar dit opgerig is eers te sien voordat verdere sake met die verskaffer gedoen word.
- Vermy 'gesiglose' transaksies.
- Vra minstens drie verwysings waar die verskaffer voorheen gewerk het.
'Ons bring jou die nuutste Mosselbaai, Tuinroete nuus'
