Rauch Gertenbach vier steeds hul 100ste bestaansjaar

Advertorial Gallery Video

MOSSELBAAI NUUS EN VIDEOS - "Ons vier dit al van Januarie af. Dis nou einde Mei en ons is van plan om hierdie golf te ry tot die einde van die jaar toe."Dít is die woorde van Danie Acker, een van die direkteure van Rauch Gertenbach.

Vrydag, 13 Mei het Rauch Gertenbach as deel van hulle eeufeesvieringe 'n gholfdag by Pinnacle Point gehou.

Tagtig spelers het vanaf 12:30 die legendariese baan aangedurf. Hoewel dit 'n kompetisie was, was daar 'n feestelike gees onder die spelers.

FOTOGALERY: Raunch Gertenbach se eeufeesviering

Glen Taute en Willy Taute met 49 punte was die dag se wenners. Tweede was Morné Gericke en Jan Badenhorst met 48 punte en derde, Ian Gallacher en Lesley Gallacher met 47 punte.

Die dag, gepaardgaande prysuitdeling en ete was om Rauch Gertenbach se lojale kliënte te bedank vir hul ondersteuning deur die jare.

Die opbrengs van die dag was ter ondersteuning van die Mosselbaai-sorgsentrum en die kinders in pleegsorg by ACVV Mosselbaai.

Alle fondse wat die dag ingesamel is, word aan dié twee organisasies geskenk.

Borge was daar in oorvloed en Acker het in sy verwelkoming elke borg en donateur bedank vir hul openhartige bydraes om van die geleentheid 'n groot sukses te maak.

Tydens die ete is daar vier waardevolle items opgeveil. Tien pryse wat deur verskeie borge geskenk is, is aan die eerste 10 spanne uitgedeel.

Daar was ook 'n oorvloed van gelukstrekkings en bykans elke speler het iets ontvang. Veldpryse vir die 7de, 9de, 13de en 17de putjies is uitgedeel.

Video - Rauch Gertenbach - Danie Acker welcoming speech (Video: Jannie du Plessis).

Die personeel van Pinnacle Point is ook bedank vir die fasiliteite en die uitstekende toestand van die baan.

Acker het namens RG en die dag se begunstigdes elkeen bedank vir hulle deelname en ondersteuning.

Met bykans 60 personeel en 14 prokureurs is Rauch Gertenbach sekerlik een van die mees gevestigde en suksesvolle besighede in die Suid-Kaap met 'n ryk geskiedenis.