MOSSELBAAI NUUS - Karlien van Jaarsveld weet nog nie wat die geslag van haar nuwe babatjie is nie, en haar eggenoot sal haar nie na Mosselbaai vergesel wanneer sy op Donderdag, 8 Junie hier in die stadsaal optree nie, maar daar is ander geheimpies wat sy in 'n onderhoud met die Mossel Bay Advertiser onthul het.
Sy het onlangs aan die Advertiser gesê sy geniet 'n gehoor die heel meeste "wanneer hulle my liedjies saam met my sing! Ek love dit," en sê sy het dit nog nie beleef dat 'n gehoor nie van een van haar nommertjies hou nie. "Dit maak werklik my hart warm wanneer die gehoor deelneem." Leer gerus solank die lirieke van haar bekende treffers vir die vertoning.
"Ons weet nog nie die geslag van die babatjie wat ons verwag nie. Ek wag altyd totdat die Here 'n naam aan my openbaar. So, vir die oomblik het ons nog nie op 'n naam besluit nie."
Joe Breytenbach, haar eggenoot, sal haar ongelukkig nie na Mosselbaai vergesel nie. "Hy's mos 'n gewone ou met 'n gewone werk."
Sy sê sy sal haar kinders nooit voorskryf watter loopbaan om te volg nie. "Hulle moet doen wat hulle voel vir hulle die beste gaan wees, maar ek gaan hulle mooi leer van die voor- en die nadele van die bedryf. Dit is belangrik dat hulle vooraf moet weet waarvoor hulle hulself inlaat."
Op die vraag wat haar geheim is om altyd vars en onopgesmuk op die verhoog voor te kom, sê Karlien: "Ek bid en omring my met mense wat omgee vir my. Dit bou my op en help in die tye wat 'n mens nie lekker voel voor 'n vertoning nie. God se krag en genade het my al deur baie moeilike tye op die verhoog gehelp."
Sy sê hoewel groot vertonings baie opwindend is en sy dit baie geniet, geniet sy juis die kleiner gehore meer, "want dan kan ek met almal connect. Tog geniet ek dit baie om saam met ander kunstenaars groot shows te doen!
Van hierdie kunstenaars is al soos my eie familie." Haar broer, Bobby, is by voorkeur die een sanger met wie sy graag 'n verhoog deel. "Hy ken my so goed en ons lees mekaar sonder om iets te sê. Ek en hy het verlede jaar saam gesing op Afrikaans is Groot en dit was een van die beste oomblikke vir my op enige verhoog."
Mosselbaaiers kan tydens die vertoning uitsien na talle van die liedjies wat Karlien self skryf. Haar eie voorkeure is Dans in die Reën, My Kruis en Twee Huise. "Twee Huise het ek vir Eliah en Daniel, my tweeling geskryf."
Tog erken sy dat sy op die langpad by voorkeur na van haar eweknieë in die Suid-Afrikaanse musiekbedryf, Elvis Blue en Joshua na die Reën, se musiek sal luister.
Karlien, die oudste van die drie Van Jaarsveld-sibbe, verkies in haar vryetyd "'n aand by die huis saam met Joe en my seuns. Ek het nie altyd gekook nie, maar Joe het my geleer. Die gunstelinggereg wat ek deesdae maak is 'n kerriehoenderdis, baie lekker!
"As jou huis môre afbrand, wat is die eerste vyf items wat jy sal red as jy kon?" vra die Advertiser aan Karlien. "Net my geliefdes. Niks anders maak saak nie." Daarnaas is die mense van Elandspoort / Danville baie na aan haar hart.
"Dis 'n baie arm gemeenskap in die weste van Pretoria. Ek en my broer het al daar oornag vir ons In jou skoene-reeks en daar is só baie spesiale mense,"
En die kleur waarin haar ondersteuners haar nie sommer sal betrap nie? "Oranje".
ARTIKEL: NICKEY LE ROUX, MOSSEL BAY ADVERTISER-NUUSREDAKTEUR
'Ons bring jou die nuutste Mosselbaai, Tuinroete nuus'
