MOSSELBAAI SAKE NUUS - Johan van der Berg het Mosselbaai Paneelkloppers op 1 Oktober 1986 begin en saam met sy vrou, Harriet, stelselmatig die besigheid opgebou en uitgebrei tot die suksesvolle familie onderneming wat dit tans is.
Hulle dogter Lené en seun Johan, het letterlik in die besigheid grootgeword en Johan en Harriet is trots daarop om die leisels nou aan die kinders oor te gee.
Een van die grootste uitdagings die afgelope 30 jaar was om tred te hou met die verandering en die implimentering van nuwe tegnologie namate die standaard van vereistes in die paneelklop-industrie verhoog en aangepas is. Dit het gepaard gegaan met hoë kapitaalinsette en met die jongste tendense in aluminiumvervaardigde voertuie. Vandag beskik hulle oor die nodige fasiliteite om met hierdie voertuie te kan werk.
Mosselbaai Paneelkloppers is ook onlangs, tydens Volkswagen Suid Afrika se jaarlikse konferensie, benoem as die enigste paneelklopper in die land wat die uitsonderlike prestasie kon behaal om ‘n skoon oudit van VW te ontvang. Hulle is goedgekeurde paneelkloppers vir Volkswagen, Audi, Ford, Mazda, General Motors, Toyota, Nissan, Hyundai en Kia. Slegs omgewingsvriendelike verfprosesse en -produkte met ‘n waterbasis van Glasurit word gebruik.
Mosselbaai Paneelkloppers kon nie vir 30 jaar suksesvol bedryf word as dit nie vir die ondersteuning van lojale kliënte asook die versekeringsmaatskappye was nie. “Ons bedank elke persoon en instansie, asook hulle personeel, wat ons deur die jare as paneelkloppers ondersteun het.”
'Ons bring jou die nuutste Mosselbaai, Tuinroete nuus'
