TUINROETE | HESSEQUA ROLBALNUUS - Onder leiding van Rossouw von Solms, president van Vista-rolbalklub op Klein Brakriver, het 14 van hul spelers Riversdal-rolbalklub besoek vir 'n dag se spel. Die rolbaldag het op Woensdag, 28 Oktober plaasgevind.
Louw Bester, sekretaris van Riversdal-rolbalklub sê Covid-19 reëls is streng toegepas deur temperatuurmeting te doen, sanitasie van hande en die invul van 'n bywoningsregister.
'n Vista en Riversdal gemengde span, met Marie Boshoff van Riversdal as kaptein (skip) het die kompetisie gewen.
Haar spanmaats was Heinrich Schnetler (Vista) en Gerald Enright (Riversdal). Hulle het met die grootste punteverskil van 11 oor die 18 koppe koning gekraai.
Spelers van beide klubs het saam in gemengde spanne van drie sosiaal gespeel en rolbalvriendskappe gesmee.
André van Wyk en PD Hougaard van Tops Riversdal het drie pryse vir die wenspan beskikbaar gestel.
Bester sê daar sal in die toekoms nouer kontak tussen omliggende klubs wees. "Meer soortgelyke unieke uitreik samespel sal aan die orde van die dag wees."
Tom Strydom, president van Eden-rolbal en lid van die Vista-rolbalklub het ook saam kom rol en kuier.
Frans Blaauw (president: Riversdal-rolbalklub, Tom Strydom (president: Eden-rolbal) en Rossouw von Solms (president: Vista-rolbalklub Klein-Brakrivier) het ook die rolbaldag saam geniet. Foto's: Celvin Basson
Marie Boshoff se wenspan het elk 'n geborgde prys van Tops Riversdal ontvang. Hulle is Heinrich Schnetler, Gerald Enright en Boshoff.
'Ons bring jou die nuutste Tuinroete, Hessequa nuus'
