MOSSELBAAI NUUS - Woensdag 10 Desember se individuele stableford het 164 spelers na die baan gelok.
In die A-afdeling (voorgee 0-13) het Derek van Heerden (voorgee 9) op 41 punte geseëvier. Deon Schoeman (voorgee 16) het seker gemaak dat hy die B-afdeling (voorgee 14-22) wen deur 42 punte op te stapel. Aan Gerhard Combrinck (voorgee 23) was daar geen keer in die C-afdeling nie. Sy 44 punte het hom laat uittroon bo sy teenstanders.
Imraan Jacobs en Gavin Reynolds se 41 punte het ook verseker dat heerlike pakke vleis saam met hulle huis toe is. Op 40 punte was daar ‘n magdom spelers, maar na die uittel het Matthew Lundie en André Middel suksesvol gewees.
Op Saterdag 13 Desember het 184 spelers na die baan gestroom wat ‘n duidelike teken is dat ons vakansie-gangers vining besig is om te kom afsaal vir ‘n lui-lekker rustyd. Die beterbal stableford kompetisie het goeie gholf opgelewer. In die A-afdeling het die gesoute pa-en-seun kombinasie van Johann en Danie van Langelaar op 46 punte met die wen-prys weggestap.
In die B-afdeling het Bart Saayman en Gielie Gagiano se rekord 55 punte die ander spelers stom van verbasing gelaat. Dit is voorwaar ‘n telling wat selde aangeteken word.
Veels geluk met ‘n besonderse vertoning! Ferdi Jonck ry nog steeds die kruin van die golf, maar in die proses het sy voorgee die afgelope twee weke vanaf 14 na 11 verander. Saterdag het hy en Louwtjie Louw op 49 punte die pap dik aangemaak en die paadjie prys-tafel toe gestap. Op 48 punte het Dolf Sonnekus en Tobie Kock, asook Wykie van de Vyver en Malan Barnard ook in die pryse gedeel.
Vrydag 19 en Saterdag 20 Desember vind die jaarlikse Mosselbaai Classic plaas. Op Vrydag tree die ATKV en Brandhouse as borge op. Saterdag is dit Coastal Meats wat die pryswenners se harte bly gaan maak. Aan genoemde borge kan ons maar net baie dankie sê vir hulle lojale en volgehoue ondersteuning.
Members and visitors are advised that bookings for the period 15 December to 5 January must be pre-paid as per usual. A booking will only be deemed confirmed as soon as the payment is received. The planned rounds must be submitted on a form which can be obtained at reception or can be downloaded from our website at www.mosselbaygolfclub.co.za.
Met die vakansie-seisoen op hande wil ons ‘n ieder en elk uitnooi om besoek by ons pragtige Klub en gholfbaan te kom aflê. Dit wat vir u wag is ‘n lowergroen, goed-versorgde baan, die pragtige springbokkies, ‘n goed toeruste gholfwinkel, ‘n restaurant met heerlike disse en voorts ‘n personeel wat u op die hande sal dra om u ervaring die moeite werd te maak. Ons sien uit na u samesyn met ons!
Saterdag se wenners van die beterbal stableford kompetisie is van links: Tobie Kock, Gielie Gagiano, Boet Pheiffer, Malan Barnard, Wykie van de Vyver, Ferdie Jonck, Johan van Langelaar en Danie van Langelaar.
'Ons bring jou die nuutste Mosselbaai, Tuinroete nuus'
