MOSSELBAAI NUUS - Erkenning ter viering van Vrouedag is op Vrydag, 5 Augustus, deur die Mosselbaaise Munisipaliteit gegee aan traumaberaders wat vrywillig hul tyd, meestal snags, in die Mosselbaaise munisipale gebied, gee om veral slagoffers van gesinsgeweld, verkragting of ander seksuele misdrywe te ondersteun. Sertifikate wat deur die Uitvoerende Burgemeester, Raadsdame Marie Ferreira, onderteken is, is namens haar deur die Uitvoerende Onderburgemeester, Raadslid Harry Levendal, aan die beraders oorhandig.

Die byeenkoms in die Ou Kragstasie by Santosstrand, wat ook deur die bevelvoerder van die verskillende polisiekantore bygewoon is, is toegespreek deur me Lizette Crause, maatskaplike werker van die Departement van Onderwys, oor die belangrikheid van traumaberaders. Me Prudence Ramnath van die Departement van Plaaslike Regering het gepraat oor slagoffers van geweld en die rol van traumakamers asook traumaberaders.

Waslappies, tandeborsels, seep en tandapasta wat deur vroulike werknemers van die Munisipaliteit geskenk is vir gebruik in die traumakamers by elkeen van die vier polisiekantore is ook by geleentheid aan die SA Polisiediens oorhandig. Die items is tydens die Munisipaliteit se eie Vrouedagvieringe ingesamel.